बागेश्वरीपोष्टको केन्द्रिय कार्यालय उद्घाटन

समाचार

गृहपृष्ठ
समाचार
बागेश्वरीपोष्टको केन्द्रिय कार्यालय उद्घाटन

बागेश्वरीपोष्टको केन्द्रिय कार्यालय उद्घाटन

शुक्रबार, माघ ९, २०७७ बागेश्वरी पोस्ट

नेपालगन्ज । अनलाइन न्युज पोर्टल बागेश्वरीपोष्ट डट कमको केन्द्रिय कार्यालय नेपालगन्जमा स्थापना गरिएको छ । नेपालगन्ज उपमहानगरपालिका वडा नम्बर १२ स्थित एसओएस मार्गमा स्थापना गरिएको कार्यालयको आज बाँकेका प्रमुख जिल्ला अधिकारी रामबहादुर कुरुम्बाङले उद्घाटन गर्नुभयो ।

कार्यालय उद्घाटन गर्दै प्रजिअ कुरुम्बाङले सत्य, तथ्य एवम् निष्पक्ष पत्रकारिताको धर्मबाट विचलित नभई समाचार सम्प्रेषण गर्न आग्रह गर्नुभयो । उहाँले राम्रा काम र प्रयासहरुको सकारात्मक ढंगले सम्प्रेषण हुन सके मात्र स्वस्थ समाज निर्माणमा सहयोग पुग्ने बताउनुभयो । उहाँले तथ्यका आधारमा मात्र समाचार सम्प्रेषण गर्न पत्रकारहरुलाई आग्रह गर्नुभयो । कुरुम्बाङले बाँकेमा काम गर्ने क्रममा आफूले मिडिया सपोर्ट नपाइरहेको गुनासो समेत गर्नुभयो ।

नेपाल पत्रकार महासंघका पूर्व महासचिव तथा नेपाली कांग्रेसका युवा नेता पोषण केसीले मिडिया समाजको ऐना भएको बताउँदै पत्रकार आचारसंहितालाई ख्याल गरेर सत्यतथ्य समाचार सम्प्रेषण गर्न आग्रह गर्नुभयो । पित पत्रकारिता गरेर समाजलाई प्रताडित गर्न नहुनेमा केसीले जोड दिनुभयो । अनलाइन मिडियाको लोकप्रियता विश्वव्यापी रहेको भन्दै उहाँले अहिले अनलाइन नै सबैभन्दा प्रभावकारी मिडिया भएको बताउनुभयो ।

नेपालगन्ज उपमहानगरपालिका वडा नम्बर ४ का वडाध्यक्ष मो. सफिक बेहनाले बागेश्वरीपोष्ट यस क्षेत्रको लोकप्रिय अनलाइन पोर्टल भएको चर्चा गर्दै आगामी दिनमा पनि निष्पक्ष पत्रकारिताको धर्मबाट विचलित नभई अगाडि बढ्न सुझाव दिनुभयो ।

नेपाली काँग्रेस नेपालगन्ज नगर कमिटिका सभापति प्रशान्त विष्टले स्वस्थ पत्रकारिताको नमुना बनेर अघि बढ्न शुभकामना दिनुभयो ।

भेरी अस्पतालका वरिष्ठ फिजिसियन डा. संकेत रिसालले जस्तोसुकै अप्ठ्यारोमा पनि विचलित नभई जनतालाई सुसूचित गर्दै अघि बढ्न आग्रह गर्नुभयो ।

युथ टुडेका सम्पादक आलम खानले कार्यालय स्थापना गरेकोमा खुशी लागेको बताउँदै निष्पक्ष पत्रकारितामा अडिग रहेर अघि बढ्न सुझाव दिनुभयो ।

कार्यालय उद्घाटन कार्यक्रममा नेपालगन्ज मेडिकल कलेजका छाती तथा फोक्सो विशेषज्ञ डा. सुभाष योगी, भेरी अस्पताल नेपालगन्जका नाक, कान तथा घाँटी विशेष ज्ञ डा. दिनेश चौधरी, जिल्ला ट्राफिक कार्यालय बाँकेका प्रमुख प्रहरी निरिक्षक राजु भण्डारी, सशस्त्र प्रहरी निरिक्षक नर बहादुर सुनुवार, वडा प्रहरी कार्यालय नेपालगन्जका प्रमुख प्रहरी निरिक्षक डिल्ली बहादुर खड्का, जिल्ला प्रहरी कार्यालय बाँकेका प्रहरी निरिक्षक ईश्वरदेव गिरी, नेपालगन्ज मेडिकल कलेजका प्रशासकीय अधिकृत कुमार अधिकारी, राप्रपाका नेपालगन्ज नगर कमिटि कोषाध्यक्ष चाँदबाबु लगायतको उपस्थिति थियो ।

संस्कृति मिडियाका अध्यक्ष गौरव गिरीको अध्यक्षता कार्यक्रम सम्पन्न भएको थियो । संस्कृति मिडियाले संचालन गर्ने अनलाइन न्युज पोर्टल बागेश्वरीपोष्ट साउन २९, २०७२ देखि सुरु भएको हो ।