अन्तर वडा स्तरीय क्रिकेट: प्रज्वलको उत्कृष्ट ब्याटिङमा १ नम्बर विजयी

खेलकुद

गृहपृष्ठ
खेलकुद
अन्तर वडा स्तरीय क्रिकेट: प्रज्वलको उत्कृष्ट ब्याटिङमा १ नम्बर विजयी

अन्तर वडा स्तरीय क्रिकेट: प्रज्वलको उत्कृष्ट ब्याटिङमा १ नम्बर विजयी

मंगलबार, माघ १४, २०७६ सुनिल रेग्मी

नेपालगन्ज। वडा नम्बर ८ र वडा नम्बर १ ले नेपालगन्जमा जारी युनाइटेड ग्रुप दोस्रो अन्तर वडा स्तरीय क्रिकेट प्रतियोगितामा जित हासिल गरेका छन ।

८ नम्बर वडाले वडा नम्बर ४ लाई २ विकेटले हरायो । अर्को खेलमा १ नम्बरले ६ नम्बरलाई ९ विकेटले हराउन सफल भएको छ । मंगल प्रसाद उच्च माविको खेल मैदानमा भएको खेलमा टस जितेर ब्याटिङ गरेको ४ नम्बर वडाले १५ ओभर खेलाइएको खेलमा ६ विकेटको नोक्सानीमा १ सय १६ रन जोडेको थियो ।

टोलीका लागि विश्वास श्रेष्ठले सर्वाधिक ६३ रन, सुनिल भण्डारीले १६ र बुद्ध अधिकारीले १४ रन जोडे । विश्वासले ३८ बलमा ५ चौका र ६ छक्का प्रहार गर्दै अर्धसतक प्रहार गरेका थिए । ८ नम्बर वडाका अनुभवी खेलाडी अनुपम सिंहले ३ विकेट लिए । उनले २ ओभरमा ८ रनमात्र दिएका थिए । जवाफी ब्याटिङमा अनुपम सिंहले ३४ रन, मोहम्मद सल्मानले २८ र फर्दिन खानले १५ रनको योगदान गरे । म्यान अफ द म्याचको पुरस्कार जितेका अनुपमले २५ बलमा ५ चौका प्रहार गरेका थिए ।

४ नम्बरका निर्मल ओलीले ३ विकेट र आकाश विष्टले २ विकेट लिए । खेलमा मोहम्मद सलमानले म्याजिक अफ द मुभमेन्टको पुरस्कार पाए । उनीहरुलाई नेपालगन्ज उपमहानगरपालिका वडा नम्बर ३ अध्यक्ष अयुव सिद्धिकी, साइन रेसिंगा विकास बैंकका क्षेत्रीय निर्देशक तेज रावल र वडा नम्बर ७ अध्यक्ष जुमन खाँले पुरस्कार दिएका थिए । यसैगरी अर्को खेलमा टस जितेर ब्याटिङ गरेको ६ नम्बर वडाले २० ओभरमा ८ विकेटको नोक्सानीमा १ सय ३७ रन बनाएको थियो ।

टोलीका लागि दिपेश बर्माले ४० रन, अफजल खानले २३ र प्रनित थापामगरले १४ रन बनाए । दिपेशले ३३ बलमा ३ चौका र २ छक्का प्रहार गरेका थिए । अफजलले २७ बलमा २ चौका र १ छक्का हाने । १ नम्बर वडाका सुगम विसीले ३ विकेट र सिद्धान्त राज शाहीले २ विकेट लिए । जवाफमा प्रज्वल शाहीले उत्कृष्ट ब्याटिङ गरेपछि १ नम्बर वडाले १८.२ ओभरमा १ विकेटको नोक्सानीमा जित हासिल गरेको थियो ।

म्यान अफ द म्याच प्रज्वलले ७० रन र सिद्धान्त राज शाहीले ३१ रन बनाए । प्रज्वलले ६२ बलमा ७ चौका र २ छक्का प्रहार गरेका थिए । ६ नम्बरका दिपेश बर्माले १ विकेट लिए । गु्रप अफ–१६ क्लबले आयोजना गरेको प्रतियोगितामा नेपालगन्ज उपमहानगरपालिकाका २३ वडाका टिमले प्रतिस्पर्धा गरिरहेका छन ।

प्रकाशित मिति: मंगलबार, माघ १४, २०७६ ०८:४३

प्रतिक्रिया दिनुहोस्