कोरोना कहर:के गर्दैछन् बाँकेका नयाँ सिडिओ कुरुम्बाङ!

समाचार

गृहपृष्ठ
समाचार
कोरोना कहर:के गर्दैछन् बाँकेका नयाँ सिडिओ कुरुम्बाङ!

कोरोना कहर:के गर्दैछन् बाँकेका नयाँ सिडिओ कुरुम्बाङ!

शम्शेरगन्जमा ४० शैयाको आइसोलेसन: अध्यक्ष थारु

शुक्रबार, जेठ १६, २०७७ सौरभ गिरी

नेपालगन्ज । बाँकेका प्रमुख जिल्ला अधिकारी राम बहादुर कुरुम्बाङले आज राप्तीसोनारी गाउँपालिकाको वडा नम्बर ८ स्थित शम्शेरगन्ज क्वारेन्टाइन तथा आइसोलेसन सेन्टरको निरिक्षण गर्नुभएको छ ।

त्यसक्रममा प्रमुख जिल्ला अधिकारी कुरुम्बाङले आइसोलेसनलाई उच्च स्तरिय बनाउन, स्वास्थ्य कार्यालय बाँकेसंग निरन्तर सम्पर्क गर्न र जिल्ला प्रशासन कार्यालयसंग समन्वय गरेर अघि बढ्न आग्रह गर्नुभयो । उहाँले समाजलाई कोरोनामुक्त बनाउन सबैको सहयोग बिना सम्भव नहुने बताउनुभयो ।

कोरोना विरुद्धको लडाईंमा अग्रभागमा खटिएकाहरुको मनोबल बढाउन जरुरी रहेको उहाँको भनाई छ ।गाउँपालिका भित्र कोरोना बिरुद्धको लडाईमा गाउँपालिकाले निर्णय गरे प्रशासनले सघाउने प्रजिअ कुरुम्बाङले बताउनुभयो।

जिल्ला प्रहरी प्रमुख प्रहरी उपरिक्षक बिर बहादुर ओलीले क्वारेन्टाइनमा बसेकाहरुको उचित तरिकाले सुरक्षा दिँदै जनप्रतिनिधि र स्वास्थ्यकर्मीसंग सहकार्य गरेर प्रहरी अघि बढिरहेको बताउनुभयो ।

त्यस्तै गाउँपालकाका अध्यक्ष लाहुराम थारुले अब शम्शेरगञ्जमा रहेको क्वारेन्टाइनलाई आइसोलेसन बनाउने जानकारी दिनुभयो । पोजेटिभ आएका सबैलाई त्यहीँ राख्ने बताउँदै उहाँले अहिले त्यहाँ ५ जना संक्रमितलाई राखिएको जानकारी दिनुभयो ।

त्यहाँ सबै गरेर ४० बेडको आइसोलेसन सेन्टर बनाइने बताउँदै उहाँले त्यहाँ रहेको क्वारेन्टाइनलाई अन्यत्रै सारिने बताउनुभयो । सबैको सहयोगले कोरोनालाई परास्त गर्न सकिने उहाँले दृढता व्यक्त गर्नुभयो । राप्तीसोनारीमा रहेका क्वारेन्टाइनलाई अझंै ब्यबस्थित गर्दै स्वास्थ्यकर्मीको मनोबल बढाएर काम गर्ने अध्यक्ष थारुले बताउनुभयो ।

प्रमुख प्रशासकीय दल बहादुर बस्नेतले सबैको सहयोगले महामारी परास्त गर्न सकिने भन्दै अब बन्ने आइसोलेसनमा सबै प्रकारको सुबिधा उपलब्ध गराइने बताउनुभयो ।

महामारी विरुद्धको लडाईंमा स्वास्थ्यकर्मी, सुरक्षाकर्मी, जनप्रतिनिधि राजनितिक दल, स्थानीय अगुवा लगायत सबैको सहयोग आबश्यक रहेको बस्नेतले बताउनुभयो ।

जिल्ला स्वास्थ्य कार्यालय बाँकेका कोरोना फोकल पर्सन नरेश श्रेष्ठले कोरोना नेगेटिभ देखिएमा क्वारेन्टाइनबाट हतारहतारमा बाहिर नपठाउन सुझाब दिँदै स्वास्थ्य कार्यालय बाँकेसंग समन्वय गर्न आग्रह गर्नुभयो ।

हालसम्म राप्तीसोनारी गाउँपालिकाका १२ जनामा कोरोना संक्रमण छ । ती मध्ये ११ जनाको गाउँपालिकाकै आइसोलेसन र एक जनाको खजुरामा उपचार भइरहेको छ ।अहिले गाउँपालिकामा १० वटा क्वारेन्टाइन र वडा नम्बर ८, वडा नम्बर ६,वडा नम्बर २ र वडा नम्बर ९ गरि ४ आइसोलेसन सेन्टर रहेका छन् ।

प्रमुख जिल्ला अधिकारी कुरुम्बाङले कार्यभार सम्हालेकै भोलिपल्ट हिजो कोरोनाको ‘हटस्पट’ नरैनापुरको अनुगमन गर्दै पछिल्लो अवस्थाबारे जानकारी लिनुभएको थियो । हिजै उहाँले राप्तीसोनारीको ७ नम्बर वडास्थित क्वारेन्टाइन र डुडुवाका क्वारेन्टाइनको पनि निरिक्षण गर्नुभएको थियो ।

प्रकाशित मिति: शुक्रबार, जेठ १६, २०७७ १९:३३