सामाजिक सञ्जालको प्रभाव- बाँकेका आइते बुढाको परिवारलाई सहयोग जुट्दै

समाचार

गृहपृष्ठ
समाचार
सामाजिक सञ्जालको प्रभाव- बाँकेका आइते बुढाको परिवारलाई सहयोग जुट्दै

सामाजिक सञ्जालको प्रभाव- बाँकेका आइते बुढाको परिवारलाई सहयोग जुट्दै

सोमबार, पुस ७, २०७६ सौरभ गिरी

नेपालगञ्ज । पुषको चिसोमा परालको भरमा बाँचिरहेका बाँके नौवस्ताका आइते बुढाको परिवारको विचल्लीका बारेमा हरित अभियन्ता हेमन्तराज काफ्लेले सामाजिक सञ्जाल फेसबुकमा पोष्ट गरेपछि सहयोगी मनहरु जुर्मराएका छन् ।

लोकेन्द्र सुनारको सितलचिनी फारम हेर्न त्यहाँ पुग्नुभएका काफ्लेले सुनार मार्फत् अन्दाजी ६० बर्षीय बुढा र उहाँको परिवारको अवस्थाका बारेमा जानकारी पाएपछि उहाँ बुढाकै घरमा पुग्नुभयो । गरिबीको चपेटामा बाँचिरहनुभएका बुढा, उहाँकी बोल्न नसक्ने श्रीमती, एक छोरी र एक छोरासहितको परिवार पराल, टिन र टायलले छाएको एक कोठे जीर्ण कच्ची घरमा पराल विछ्याउने र परालै आढेर बसिरहेको दृश्य देखेपछि मन थाम्न नसकेका काफ्लेले सामाजिक सञ्जाल फेसबुकमार्फत् उनीहरुको पीडा उजागर गर्नुभयो ।

त्यसपछि बुढाको परिवारलाई सहयोग गर्ने सहयोगी हातहरु अघि बढेका छन् । गीतकार एवम् समाजसेवी सहदेव प्रसाद सापकोटाले १० हजार रुपैयाँ सहयोग गर्नुभएको छ । त्यस्तै जीवन चौधरीले आफ्नो चर्च मार्फत् चार वटा कम्मल, कापी, कलम र तीन वटा हट ब्याग उपलब्ध गराउनुभएको छ । विपन्न बुढा परिवारलाई एउटा बस्न लायक घर बनाउने आफ्नो योजना रहेको काफ्लेले बताउनुभयो ।