नेपालगञ्जमा पूर्ण खोप कार्यक्रमको समीक्षा तथा दिगोपना सम्बन्धि गोष्ठी

स्वास्थ्य

गृहपृष्ठ
स्वास्थ्य
नेपालगञ्जमा पूर्ण खोप कार्यक्रमको समीक्षा तथा दिगोपना सम्बन्धि गोष्ठी

नेपालगञ्जमा पूर्ण खोप कार्यक्रमको समीक्षा तथा दिगोपना सम्बन्धि गोष्ठी

शुक्रबार, मंसिर २३, २०७९ बागेश्वरी पोस्ट

नेपालगञ्ज । नेपालगञ्जमा आज पूर्ण खोप कार्यक्रमको समीक्षा तथा पूर्ण खोप दिगोपना र सरसफाई प्रबद्र्धन योजना तयारी सम्बन्धि गोष्ठी सम्पन्न भएको छ ।

पालिका खोप समन्वय समिति, वडा प्रतिनिधि र स्वास्थ्य संस्था प्रमुखहरुको उपस्थितिमा स्वास्थ्य कार्यालय बाँकेले आयोजना गरेको गोष्ठीमा स्वास्थ्य कार्यालय बाँकेका खोप सुपरभाइजर नरेशबाबु श्रेष्ठले प्रस्तुतिकरण गरेका थिए । श्रेष्ठले खोप कभरेज बढाउँदै दिगोपनाका लागि स्थानीय तहहरुले खोप अभियानलाई प्रभावकारी ढंगले अगाडि बढाउनुपर्ने बताए ।

गोष्ठीमा बोल्दै नेपालगञ्ज उपमहानगरपालिकाका नगर प्रमुख प्रशान्त विष्टले खोपको सुनिश्चितता र दिगोपना अत्यन्त जरुरी रहेको बन्दै स्वस्थ समाज निर्माणका लागि खोप अनिवार्य शर्त भएको बताए । उनले स्वास्थ्य क्षेत्रको विकास र सुधारका लागि नेपालगञ्ज उपमहानगरपालिका संवदनशील भएको बताउँदै स्वस्थ नगरपालिका बनाउने अठोटका साथ अघि बढेको उल्लेख गरे । नगर प्रमुख विष्टले बालबालिकालाई स्वस्थ बनाउन सके मात्र मुलुकले स्वस्थ्य कर्णधार पाउने भन्दै खोप अभियानलाई प्रभावकारी ढंगले सञ्चालन गर्न निर्देशन दिए ।

नेपालगञ्ज उपमहानगरपालिकाका प्रमुख प्रशासकीय अधिकृत शिवप्रसाद रिजालले समस्या र आवश्यकताहरुलाई सुक्ष्म ढंगले हेर्दै सुक्ष्म योजनाका साथ अघि बढ्न जरुरी रहेको बताए । स्वास्थ्य कार्यालय बाँकेकी प्रमुख सुनिता पौडेलले कुनै पनि खोप नपाएका बालबालिका अझै चार प्रतिशत रहेको भन्दै त्यही संख्याबाट जुनसुकै बेला महामारी आउन सक्ने खतरा औल्याइन् । उनले खोप उचित तरिकाले पुग्न नसके समाज स्वस्थ नहुने बताउँदै स्थानीय तहको काँधमा ठूलो जिम्मेवारी रहेको उल्लेख गरिन् ।

गोष्ठीमा नेपालगञ्ज उपमहानगरपालिकाका प्रबक्ता एवम् वडा नम्बर १ का वडा अध्यक्ष प्रमोद रिजालले कुन-कुन वडामा कुन-कुन क्लष्टरका बालबालिका छुटेका छन्, त्यसै अनुरुप रणनीति बनाएर खोप अभियानको प्रभावकारिता बढाउनुपर्ने बताए । वडा नम्बर २० का वडा अध्यक्ष कौशलकुमार धोबीले स्वास्थ्य क्षेत्रलाई प्राथमिकतामा राखेर काम गर्नुपर्ने आवश्यकता औंल्याए ।

स्वास्थ्य कार्यालयले बाँकेका ८ पालिकामध्ये नेपालगञ्जसहित ७ पालिकामा यसप्रकारको गोष्ठी गरिसकेको बताएको छ । अब कोहलपुर नगरपालिका मात्र बाँकी रहेको खोप फोकलपर्सन श्रेष्ठले बताए ।

प्रकाशित मिति: शुक्रबार, मंसिर २३, २०७९ ११:०२