नेपालगन्जमा दादुरा देखिएपछि विश्व स्वास्थ्य सङ्गठनकाे टिम खटियो

स्वास्थ्य

गृहपृष्ठ
स्वास्थ्य
नेपालगन्जमा दादुरा देखिएपछि विश्व स्वास्थ्य सङ्गठनकाे टिम खटियो

नेपालगन्जमा दादुरा देखिएपछि विश्व स्वास्थ्य सङ्गठनकाे टिम खटियो

बुधबार, पुस २०, २०७९ बागेश्वरी पोस्ट

नेपालगन्ज । बाँकेको नेपालगञ्जमा बालबालिकामा दादुरा रोग देखा परेको छ । नेपालगञ्ज उपमहानगरपालिका–७ मा एकै घरका चार बालबालिकामा दादुरा देखिएको हो ।पाँचदेखि १२ वर्ष उमेरका तीन बालिका र एक बालकमा दादुरा पुष्टि भएको हो ।

त्यहाँ अरु १७ बालबालिकामा पनि दादुराको आशङ्का गरिएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । लामो समयपछि नेपालगञ्जमा दादुरा देखिएपछि विश्व स्वास्थ्य सङ्गठन र स्वास्थ्य कार्यालय बाँकेको टोली घटनास्थलमा खटिएको उनले बताए ।

नेपालले सन् २०२३ सम्ममा दादुरालाई निवारण गर्ने लक्ष्य लिएको छ । दादुराको खोप नलगाएका या खोप पूरा नगरेका व्यक्तिमा दादुरा देखिने खोप फोकल पर्सन श्रेष्ठले बताए । सहजै फैलिने दादुराको पुष्टि भएका ती बालबालिका एउटै परिवारको भएको स्वास्थ्य कार्यालय बाँकेका प्रमुख सुनिता पौडेलले जानकारी दिइन् ।

उनका अनुसार ज्वरो आउने, जीउ दुख्ने, रुघाखोकी लाग्ने तथा मुखभित्र नीलो र सेतो रङ्गको दागलगायत लक्षण देखिएपछि उनीहरूलाई उपचारका लागि बालरोग विशेषज्ञ डा. विनोद खेतान कहाँ लगिएको थियो ।

'दादुराको जस्तो लक्षण देखिएपछि विश्व स्वास्थ्य सङ्गठनसँगको सहकार्यमा पाँच जनाको रगत परीक्षणका लागि काठमाडौं पठाएका थियौँ', प्रमुख पौडेलले भने, 'पाँच मध्ये चार जनामा दादुरा सङ्क्रमण पुष्टि भएको रिपोर्ट आएको छ ।'

प्रकाशित मिति: बुधबार, पुस २०, २०७९ १४:४९

प्रतिक्रिया दिनुहोस्