नेपालगन्जमा दादुरा महामारी फैलिएपछि जाँच-पड़ताल

स्वास्थ्य

गृहपृष्ठ
स्वास्थ्य
नेपालगन्जमा दादुरा महामारी फैलिएपछि जाँच-पड़ताल

नेपालगन्जमा दादुरा महामारी फैलिएपछि जाँच-पड़ताल

बुधबार, पुस २०, २०७९ बागेश्वरी पोस्ट

नेपालगन्ज । नेपालगन्ज उपमहानगरपालिकाभित्र दादुराको महामारी फैलिएपछि जाँच-पड़ताल सुरु गरिएको छ ।

नेपालगन्ज उपमहानगरपालिकाले प्रभावित क्षेत्रमा दादुरा/रुवेला शंकास्पद विरामीहरुको जाँच, परीक्षण तथा व्यवस्थापन शिविर सुरु गरेको हो । आज वडा नम्बर ५, ७ र ८ मा ७० जनाको स्क्रिनिङ गरिएकोमा थप ८ जनामा दादुरा देखिएको छ । स्क्रिनिङमा ती बालबालिकाको लक्षण चिन्ह हेर्दा दादुरा जस्तै देखिएको स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए । लक्षण चिन्हलाई आधार मान्दा ती बालबालिकामा दादुरा नै भएको बस्नेतले उल्लेख गरे । शिविरमा बालरोग विशेषज्ञहरुले जाँच गरेका थिए । कान्ति आरोग्य अस्पतालकी बालरोग विशेषज्ञ डा.रोमा बोरा, भेरी अस्पतालका बालरोग विशेषज्ञ डा.विष्णु थापा र नेपालगञ्ज मेडिकल कलेजकी बालरोग विशेषज्ञ डा.निशा थापाले जाँच गरेका हुन् ।

No description available.

यो संगै हालसम्म नगरभित्र दुई दर्जन बालबालिकामा दादुरा देखिएको स्वास्थ्य महाशाखा प्रमुख रामबहादुर चन्दले जानकारी दिए । जनस्वास्थ्य प्रोटोकल अनुसार एउटै समुदायमा पाँच जना भन्दा धेरै बालबालिकामा दादुरा देखिए त्यसलाई महामारी नै मानिने चन्दले बताए । समुदायस्तरमा दादुरा फैलिएपछि दादुरा देखिएका बालबालिकालाई आइसोलेट गरेर उपचार गर्ने, वरपरका बालबालिकाको स्क्रिनिङ गर्ने र जनचेतना फैलाउने काम सुरु भएको पनि चन्दको भनाई छ । खोप लगाएको/नलगाएको एकिन गरेर दादुराको खोप लगाउने कार्यलाई अब अभियानकै रुपमा अघि बढाउने चन्दले बताए । सुरुमा दुई दिन अघि नेपालगन्ज-७ मा एकै परिवारका ४ जना बालबालिकामा दादुरा पुष्टि भएको थियो ।

दादुरा श्वासप्रश्वासका माध्यमबाट तीब्र गतिमा सर्ने र फैलिने भएकाले नेपालगन्जका बालबालिका दादुरा महामारीको उच्च जोखिममा परेको स्वास्थ्य कार्यालय बाँकेका खोप फोकलपर्सन नरेश श्रेष्ठले बताए । उनले दादुरा देखिएका वडामा १५ वर्ष मूनिका बालबालिकालाई खोप लगाउने तयारी भइरहेको बताए । दादुराको महामारी देखिएपछि स्वास्थ्य कार्यालय बाँके, नेपालगन्ज उपमहानगरपालिका, विश्व स्वास्थ्य स्वास्थ्य संगठन, युनिसेफ, वडा स्वास्थ्यकर्मीको टिम प्रभावित क्षेत्रमा परिचालन भएको छ ।

प्रकाशित मिति: बुधबार, पुस २०, २०७९ २०:००

प्रतिक्रिया दिनुहोस्