१५७ जना नयाँ कुष्ठरोगीको पहिचान

स्वास्थ्य

गृहपृष्ठ
स्वास्थ्य
१५७ जना नयाँ कुष्ठरोगीको पहिचान

१५७ जना नयाँ कुष्ठरोगीको पहिचान

बुधबार, पुस २०, २०७९ बागेश्वरी पोस्ट

नेपालगञ्ज । साइनिङ अस्पतालमा १५७ जना नयाँ कुष्ठरोगीको पहिचान भएको छ । आइएनएफद्वारा संचालित साइनिङ अस्पतालका अनुसार आर्थिक वर्ष ०७८/७९ मा १५७ जनामा कुष्ठरोगको पहिचान भएको हो । छाला, कुष्ठ तथा क्षयरोगका विरामीहरुको उपचार गर्दै आएको यो अस्पतालमा पहिचान भएका मध्ये ६१ जना बाँकेका हुन् ।

अन्य विरामी भने लुम्बिनी, कर्णाली, सुदूरपश्चिम प्रदेशका विभिन्न जिल्लाका छन् । नयाँ कुष्ठरोगीमा बालबालिका पनि परेका छन् । बाँके र बर्दियाका २/२ जना र कैलालीका एक जना बालकमा कुष्ठरोग देखिएको छ । साइनिङ अस्पतालले अस्पतालमा आएका विरामीलाई मात्र स्क्रिनिङ गर्दैन । ठाउँठाउँमा शिविर समेत राखेर कुष्ठरोगी खोज्ने काम गर्छ । बर्दिया र बाँकेका ३ ठाउँमा राखिएको शिविरमा ५ हजार ५ सय ८६ जनाको स्क्रिनिङ गर्दा ३० जना नयाँ रोगी फेला परेका थिए ।

जानकी गाउँपालिका ३ मा रहेको यो अस्पतालमा आर्थिक वर्ष ०७८/७९ मा १५ हजार ५ सय ८२ जना विरामीले ओपिडी सेवा लिएको अस्पताल प्रमुख मंगलप्रसाद थारुले जानकारी दिए । उनका अनुसार सबैभन्दा धेरै १३ हजार ५ सय ४ जना छालाका विरामीले सेवा लिएका छन् । २४ बेड रहेको अस्पतालमा एक वर्षमा १३० जना कुष्ठरोगीका विरामी उपचारका लागि भर्ना भएका छन् । साइनिङ अस्पतालमा सेवा लिनेहरुमा बाँकेका १९ प्रतिशत, बर्दियाका २१, लुम्बिनी प्रदेश (बाँके र बर्दिया बाहेक) का १८, कर्णाली प्रदेशका २४, सुदूरपश्चिम प्रदेशका १५ र भारतका २ प्रतिशत विरामी छन् ।

पछिल्लो समय बालबालिकामा पनि कुष्ठरोगको संक्रमण देखिएकाले निवारण चुनौतिपूर्ण रहेको स्वास्थ्यकर्मीहरु बताउँछन् । पाँच वर्षसम्म कुनै पनि बालबालिकामा कुष्ठरोग देखिएन भने निवारण भएको मानिन्छ । तर, यस क्षेत्रमा कुष्ठरोग पहिचान भएका मध्ये ३ प्रतिशत बालबालिकामा कुष्ठरोग देखिएको छ । यसले अहिले पनि समाजमा कुष्ठरोग सर्ने क्रममै रहेको पुष्टि गर्छ । आइएनएफले आज नेपालगन्जमा आयोजना गरेको सामाजिक लेखा परीक्षण तथा जिल्ला परियोजना सल्लाहाकार समितिको बैठकमा सो जानकारी गराएको हो ।

जिल्ला समन्वय समितिका उपसंयोजक सीता कार्कीको अध्यक्षतामा भएको कार्यक्रममा नेपालगञ्ज उपमहानगरपालिका महिला बालबालिका तथा जेष्ठ नागरिक शाखा प्रमुख शोभा शाह, स्वास्थ्य कार्यालय बाँकेका प्रमुख सुनिता पौडेल, स्वास्थ्य कार्यालय बर्दियाका प्रमुख गोकर्ण गिरी, भेरी अस्पतालका निमित्त मेसु डा. कृष्ण आचार्य, नेपालगन्ज उपमहानगरपालिका वडा नं ९ का अध्यक्ष गोविन्द रेग्मी लगायतले आआफ्नो धारणा राखेका थिए । कार्यक्रममा जनप्रतिनिधि, स्वास्थ्य संस्थाका अधिकारी तथा पत्रकारहरुको सहभागिता रहेको थियो ।

प्रकाशित मिति: बुधबार, पुस २०, २०७९ २०:३०