दादुराको महामारी फैलिएपछि नेपालगञ्जमा आजदेखि खोप लगाउन शुरु

स्वास्थ्य

गृहपृष्ठ
स्वास्थ्य
दादुराको महामारी फैलिएपछि नेपालगञ्जमा आजदेखि खोप लगाउन शुरु

दादुराको महामारी फैलिएपछि नेपालगञ्जमा आजदेखि खोप लगाउन शुरु

शुक्रबार, पुस २२, २०७९ बागेश्वरी पोस्ट

फाइल फोटो

नेपालगञ्ज । बाँकेको नेपालगञ्ज उपमहानगरपालिकामा दादुराको महामारी फैलिएपछि आजदेखि खोप अभियान थालिएको छ । केही दिन यता समुदायस्तरमै दादुरा प्रभावित बालबालिकाको संख्या उल्लेख्य देखिएपछि आजदेखि खोप लगाउन शुरु गरिएको नेपालगञ्ज उपमहानगरपालिकाका स्वास्थ्य महाशाखा प्रमुख रामबहादुर चन्दले बताए ।

May be an image of 2 people and child

वडा नम्बर ५, ७ र ८ मा खोप लगाउन शुरु गरिएको चन्दले जानकारी दिए । यी वडाहरुमा दादुरा प्रभावित बालबालिका बढी भेटिएका छन् । वडा नम्बर ५, ७ र ८ स्थित सहरी स्वास्थ्य क्लिनिक र वडा नम्बर ८ स्थित आइडियल स्कुलमा खोप केन्द्र सञ्चालन गरिएको छ । यी वडाका करिब ४५ सय बालबालिकालाई खोप लगाउने लक्ष्य छ ।

दादुरा देखिएका वडाहरु ५, ७, ८, ९, १०, ११, १४, १५, २२ मा तत्काल खोप अभियान चलाइँदैछ । अभियान सबै वडामा पुर्‍याउने तयारी रहेको चन्दले जानकारी दिए । नेपालगञ्जमा ५ वर्षमाथिका बालबालिकामा प्रकोप देखिएकाले ६ महिनादेखि १५ वर्ष उमेरका बालबालिकामा खोप लगाइँदैछ । जोखिम देखिएका वडाहरुका ६ महिना देखि १५ वर्ष उमेर समूहका करिब ११ हजार बालबालिकाहरुलाई दादुरा रुवेला विरुद्धको खोप प्रदान गर्न शुरु गरिएको छ ।

नेपालगञ्ज उपमहानगरपालिकाले दादुरा देखिएका बालबालिकालाई घरमै छुट्टै राखेर उपचार गर्ने र गम्भीर बिरामी भएकालाई अस्पताल लैजाने व्यवस्था मिलाएको चन्दले बताए । दादुराले नेपालगञ्जमा एक बालकको मृत्यु भइसकेको छ भने ३२ जना बिरामी फेला परेका छन् ।

प्रकाशित मिति: शुक्रबार, पुस २२, २०७९ १२:३५