नेपालगञ्जमा दादुरा खोप अभियानः पहिलो दिन ८७५ लाई खोप

स्वास्थ्य

गृहपृष्ठ
स्वास्थ्य
नेपालगञ्जमा दादुरा खोप अभियानः पहिलो दिन ८७५ लाई खोप

नेपालगञ्जमा दादुरा खोप अभियानः पहिलो दिन ८७५ लाई खोप

शुक्रबार, पुस २२, २०७९ बागेश्वरी पोस्ट

नेपालगञ्ज । नेपालगञ्जका केही वडाहरुमा दादुरा देखिएपछि खोप अभियान शुरु गरिएको छ । आजदेखि दादुरा प्रभावित वडाहरुमा खोप अभियान शुरु गरिएको हो । पहिलो दिन आज ८७५ बालबालिकालाई दादुरा विरुद्धको खोप लगाइएको छ । ४४१ बालिका र ४३४ बालकलाई दादुरा विरुद्धको खोप लगाइएको नेपालगञ्ज उपमहानगरपालिकाका जनस्वास्थ्य निरीक्षक तेज वलीले बताए ।

५, ७ र ८ नम्बर वडाबाट दादुरा विरुद्धको खोप लगाउन शुरु गरिएको हो । वडा नम्बर ५ मा २९६, ७ मा ५०९ र वडा नम्बर ८ मा ७० जनालाई खोप लगाइएको वलीले जानकारी दिए । ६ महिनादेखि १५ बर्षसम्मका बालबालिकालाई खोप लगाउने लक्ष्य छ । ५, ७, ८, १०, ११, १५ र २२ गरी दादुरा प्रभावित ७ वटा वडाका १०९९८ बालबालिकालाई खोप लगाउने लक्ष्य लिइएको स्वास्थ्य महाशाखाका प्रमुख रामबहादुर चन्दले बताए । चन्दका अनुसार खोप लगाउन आएका अधिकांश बालबालिकाले यसअघि दादुरा विरुद्धको खोप लगाएका छैनन् ।

पुस १४ गते वडा नम्बर ७ का ४ जनामा संक्रमण पुष्टि भएसंगै हालसम्म नेपालगञ्जका ३६ जनामा दादुरा देखिएको छ । दादुराका कारण अढाई बर्षीय बालकले ज्यान गुमाएका छन् । हाल ३५ जना दादुरा प्रभावित बालबालिका उपचारमा रहेको स्वास्थ्य कार्यालय बाँकेका खोप फोकलपर्सन नरेश श्रेष्ठले बताए ।

प्रकाशित मिति: शुक्रबार, पुस २२, २०७९ १९:०६

प्रतिक्रिया दिनुहोस्