नेपालगञ्जमा दोस्रो दिन ३८३ जनाले लगाए दादुरा खोप

स्वास्थ्य

गृहपृष्ठ
स्वास्थ्य
नेपालगञ्जमा दोस्रो दिन ३८३ जनाले लगाए दादुरा खोप

नेपालगञ्जमा दोस्रो दिन ३८३ जनाले लगाए दादुरा खोप

शनिबार, पुस २३, २०७९ बागेश्वरी पोस्ट

नेपालगञ्ज । नेपालगञ्जमा दादुरा देखिएपछि थालिएको खोप अभियानको दोस्रो दिन ३८३ जनालाई खोप लगाइएको छ । नेपालगञ्ज उपमहानगरपालिकाका जनस्वास्थ्य निरीक्षक जागेश्वर बस्नेतका अनुसार दोस्रो दिन आज २०९ बालक र १७४ बालिकालाई दादुरा-रुबेला विरुद्धको खोप लगाइएको छ ।

५, ७ र ८ नम्बर वडाबाट दादुरा विरुद्धको खोप लगाउन शुरु गरिएको हो । पहिलो दिन हिजो ८७५ जनालाई खोप लगाइएको थियो । दुई दिनमा १२५८ जनालाई खोप लगाइएको बस्नेतले बताए । आज वडा नम्बर ५ मा २१०, ७ मा ९२ र वडा नम्बर ८ मा ८१ जनालाई खोप लगाइएको छ ।

No photo description available.

६ महिनादेखि १५ बर्षसम्मका बालबालिकालाई खोप लगाइँदैछ । ५, ७, ८, १०, ११, १५ र २२ गरी दादुरा प्रभावित ७ वटा वडाका १०९९८ बालबालिकालाई खोप लगाउने लक्ष्य लिइएको स्वास्थ्य महाशाखाका प्रमुख रामबहादुर चन्दले बताए । चन्दका अनुसार खोप लगाउन आएका अधिकांश बालबालिकाले यसअघि दादुरा विरुद्धको खोप लगाएका छैनन् ।

पुस १४ गते वडा नम्बर ७ का ४ जनामा संक्रमण पुष्टि भएसंगै हालसम्म नेपालगञ्जका १० वटा वडाका ६३ जनामा दादुरा देखिएको छ । दादुराका कारण अढाई बर्षीय बालकले ज्यान समेत गुमाएका छन् । हाल ६३ जना दादुरा प्रभावित बालबालिका उपचारमा रहेको जनस्वास्थ्य निरीक्षक तेज वलीले वताए ।

No photo description available.