बाँकेमा दादुराका ९२ विरामी भेटिए, २११९ जनालाई खोप

स्वास्थ्य

गृहपृष्ठ
स्वास्थ्य
बाँकेमा दादुराका ९२ विरामी भेटिए, २११९ जनालाई खोप

बाँकेमा दादुराका ९२ विरामी भेटिए, २११९ जनालाई खोप

सोमबार, पुस २५, २०७९ बागेश्वरी पोस्ट

नेपालगञ्ज । बाँकेमा हालसम्म दादुराका ९२ जना विरामी भेटिएका छन् । नेपालगञ्ज उपमहानगरपालिकामा ९० र खजुरा गाउँपालिकामा २ जना दादुराका विरामी भेटिएका हुन् । दुई साताको अवधिमा ९२ जना विरामी भेटिएका हुन् । आज मात्रै १४ जना विरामी भेटिएका हुन् । नेपालगञ्जका १० वटा वडा र खजुराका एउटा वडामा विरामी भेटिएका छन् । नेपालगञ्जका वडा नम्बर ७, ८ र ९ मा बढी विरामी भेटिएको नेपालगञ्ज उपहानगरपालिका स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए । वडा नम्बर ९ मा २९ जना, वडा नम्बर ८ मा २८ जना र वडा नम्बर ७ मा १५ जना दादराका विरामी भेटिएका छन् । वडा नम्बर १ मा एक जनाको ज्यान गएको छ ।

दादुरा प्रभावित वडाहरुमा चार दिनदेखि खोप अभियान जारी छ । दादुराको प्रभावकारी रोकथाम र नियन्त्रणका लागि खोप अभियानलाई सशक्त ढंगले अगाडि बढाइएको स्वास्थ्य महाशाखा प्रमुख रामबहादुर चन्दले बताए । खोप प्रभावित वडाहरुमा खोप कभरेज बढाउन आज विभिन्न ठाउँहरुमा अभिमुखीकरण कार्यक्रम समेत गरिएको चन्दले जानकारी दिए । वडा नम्बर ४, ५, ७, ८, १४ र १५ नम्बर वडाका उपयुक्त स्थानमा खोप केन्द्र सञ्चालन गर्न जनप्रतिनिधि, महिला स्वास्थ्य स्वयंसेविका, विद्यालय शिक्षक, धर्मगुरु, मदरसा शिक्षक लगायतको उपस्थितिमा अभिमुखीकरण गरी खोप केन्द्र छनौट गरिएको छ ।

यसैबीच खोप अभियान शुरु भएको चौथो दिनसम्म २११९ जनालाई दादुरा-रुबेला विरुद्धको खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । आज चौथो दिन ३९९ जनालाई खोप लगाइएको छ । ६ महिनादेखि १५ बर्ष सम्मका बालबालिकालाई दादुरा रुबेला विरुद्धको खोप लगाइँदैछ । श्रेष्ठले दादुरा रोकथाम र नियन्त्रणका लागि स्वास्थ्य कार्यालय बाँकेले आज दिनभर विभिन्न क्रियाकलाप गरेको बताए ।

नेपालगञ्जका वडा नम्बर ५, ७ र ८ मा विहानदेखि साँझसम्म जनचेतनामूलक सन्देशसहितको माइकिंग, नेपालगञ्ज र खजुराका दादुरा प्रभावित वडाहरुमा डब्लुएचओ, युनिसेफका प्रतिनिधिसहित पुगेर बस्तुस्थिति अवलोकन, खाज पड्ताल तथा जाँच, उपचार र खोप अभियानमा सहजीकरण लगायतका गतिविधि गरिएको श्रेष्ठले जानकारी दिए ।

प्रकाशित मिति: सोमबार, पुस २५, २०७९ २०:४९