नेपालगञ्जमा दादुरा संक्रमित १०८ पुगे, पाँच दिनमा ३९३२ जनालाई खोप

स्वास्थ्य

गृहपृष्ठ
स्वास्थ्य
नेपालगञ्जमा दादुरा संक्रमित १०८ पुगे, पाँच दिनमा ३९३२ जनालाई खोप

नेपालगञ्जमा दादुरा संक्रमित १०८ पुगे, पाँच दिनमा ३९३२ जनालाई खोप

बुधबार, पुस २७, २०७९ बागेश्वरी पोस्ट

नेपालगञ्ज । नेपालगञ्ज यही पुस १२ गतेदेखि फैलिएको दादुराबाट संक्रमित हुने बालबालिकाको संख्या १०८ पुगेको छ । नेपालगञ्ज उपमहानगरपालिकाका वडा नम्बर–१, ५, ७, ८, ९, १०, ११, १४, १५ र २२ मा गरी १० वटा वडाका १०८ जनामा संक्रमण देखिएको हो । हिजो मात्रै थप १८ जना दादुरा प्रभावित बालबालिका भेटिएका हुन् । बाँकेमा दादुराको संक्रमण पुष्टि भएका बिरामीकाे संख्या १ सय १० पुगेकाे छ । खजुरामा २ जनामा यसअघि दादुराको संक्रमण पुष्टि भएको थियाे ।

उपमहानगरको स्वास्थ्य महाशाखा प्रमुख रामबहादुर चन्दका अनुसार संक्रमित मध्ये दुई बालबालिकाको अवस्था गम्भीर छ । उनीहरूको भेरी अस्पतालमा उपचार भइरहेको छ । अरू संक्रमितलाई होम आइसोलेसनमा राखिएको छ । मिजल्स भाइरसका कारण केही दिनअघि नेपालगञ्ज ५ का ३१ महिने एक शिशुको मृत्यु भएको थियो । उपमहानगरले संक्रमित देखिएका सबै वडामा भिटामिन ‘ए’ र दादुरा विरुद्धको खोप दिइरहेको छ । खोप अभियान शुरु गरेको पाँचौं दिनसम्म नेपालगञ्जका ३९३२ जनालाई खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । ६ महिनादेखि १५ वर्षसम्मका बालबालिकालाई खोप लगाइरहेको श्रेष्ठले बताए ।

दादुराको रोकथाम र नियन्त्रणका लागि दादुरा-रुबेला विरुद्धको खोप लगाउने कार्यलाई अभियानकै रुपमा अघि बढाइएको नेपालगञ्ज उपमहानगरपालिका स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए । उनका अनुसार आज पनि विभिन्न ७ वटा वडाका १३ वटा खोप केन्द्रहरुबाट खोप लगाउने कार्य भइरहेको छ । १, ४, ५, ७, ८, १४, १५ वडामा आज खोप चलिरहेको छ । महाशाखा प्रमुख चन्दका अनुसार संक्रमित हुनेमा अधिकांश ५ देखि १० वर्ष उमेर समूहका बालबालिका छन् । ती मध्ये कतिपयले कुनै पनि खोप नलगाएको र धेरैले पूर्ण खोप नलगाएको पाइएको छ ।

प्रकाशित मिति: बुधबार, पुस २७, २०७९ १३:३०

प्रतिक्रिया दिनुहोस्