नेपालगञ्जमा ६ दिनमा ७ हजारलाई दादुरा खोप, संक्रमितको संख्या ११३ पुग्यो

स्वास्थ्य

गृहपृष्ठ
स्वास्थ्य
नेपालगञ्जमा ६ दिनमा ७ हजारलाई दादुरा खोप, संक्रमितको संख्या ११३ पुग्यो

नेपालगञ्जमा ६ दिनमा ७ हजारलाई दादुरा खोप, संक्रमितको संख्या ११३ पुग्यो

६० जना उपचारमा, ५२ जना निको

बुधबार, पुस २७, २०७९ बागेश्वरी पोस्ट

नेपालगञ्ज । नेपालगञ्ज यही पुस १२ गतेदेखि फैलिएको दादुराबाट संक्रमित हुने बालबालिकाको संख्या ११३ पुगेको छ । नेपालगञ्ज उपमहानगरपालिकाका वडा नम्बर–१, ३, ५, ७, ८, ९, १०, ११, १४, १५, १६ र २२ मा गरी १२ वटा वडाका ११३ जनामा संक्रमण देखिएको हो । आज मात्रै थप ५ जना दादुरा प्रभावित बालबालिका भेटिएका हुन् । दादुरा प्रभावित वडामा अब वडा नम्बर ३ र १६ पनि थपिएका छन् । बाँकेमा दादुराको संक्रमण पुष्टि भएका बिरामीको संख्या १ सय १५ पुगेको छ । खजुरामा २ जनामा यसअघि दादुराको संक्रमण पुष्टि भएको थियो ।

उपमहानगरको स्वास्थ्य महाशाखाका जनस्वास्थ्य निरीक्षक जागेश्वर बस्नेतका अनुसार संक्रमित मध्ये दुई बालबालिकाको अवस्था गम्भीर छ । वडा नम्बर ५ का उनीहरूको भेरी अस्पतालमा उपचार भइरहेको छ । ५८ जना संक्रमितलाई होम आइसोलेसनमा राखिएको छ भने ५२ जना निको भइसकेका छन् । मिजल्स भाइरसका कारण केही दिनअघि नेपालगञ्ज ५ का ३१ महिने एक शिशुको मृत्यु भएको थियो ।

No photo description available.

उपमहानगरले संक्रमित देखिएका सबै वडामा दादुरा विरुद्धको खोप दिइरहेको छ । खोप अभियान शुरु गरेको आज छैठौ दिनसम्म नेपालगञ्जका ७१६३ जनालाई खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । ६ महिनादेखि १५ वर्षसम्मका बालबालिकालाई खोप लगाइरहेको श्रेष्ठले बताए ।

May be an image of text

दादुराको रोकथाम र नियन्त्रणका लागि दादुरा-रुबेला विरुद्धको खोप लगाउने कार्यलाई अभियानकै रुपमा अघि बढाइएको जनस्वास्थ्य निरीक्षक बस्नेतले बताए । उनका अनुसार आज पनि विभिन्न ७ वटा वडाका १३ वटा खोप केन्द्रहरुबाट खोप लगाइएको छ । १, ४, ५, ७, ८, १४, १५ नम्बर वडामा आज खोप लगाइएको हो । भोली वडा नम्बर १, ४, ५, ७, ८, ११, १४ र १५ का १५ वटा खोप केन्द्रबाट ६ महिनादेखि १५ बर्ष सम्मका बालबालिकाहरुलाई दादुरा-रुबेला खोप प्रदान गरिने बस्नेतले जानकारी दिए । संक्रमित हुनेमा अधिकांश ५ देखि १० वर्ष उमेर समूहका बालबालिका छन् । ती मध्ये कतिपयले कुनै पनि खोप नलगाएको र धेरैले पूर्ण खोप नलगाएको पाइएको छ ।

No description available.