बाँकेमा दादुरा संक्रमितको संख्या १६० पुग्दा ११० जना निको, १२८४५ लाई खोप

स्वास्थ्य

गृहपृष्ठ
स्वास्थ्य
बाँकेमा दादुरा संक्रमितको संख्या १६० पुग्दा ११० जना निको, १२८४५ लाई खोप

बाँकेमा दादुरा संक्रमितको संख्या १६० पुग्दा ११० जना निको, १२८४५ लाई खोप

शुक्रबार, पुस २९, २०७९ बागेश्वरी पोस्ट

नेपालगञ्ज । नेपालगञ्जमा दादुरा संक्रमित १०७ जना विरामी निको भएका छन् । पुस १२ गतेदेखि फैलिएको दादुरा प्रकोपका कारण नेपालगञ्जमा मात्रै हालसम्म १५६ जना बालबालिका प्रभावित भएकोमा ४८ जना होम आइसोलेसनमा रहेको नेपालगञ्ज उपमहानगरपालिका स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए ।

नेपालगञ्जमा आज मात्रै थप २६ जना दादुरा प्रभावित बालबालिका भेटिएका हुन् । दादुरा फैलिएपछि नेपालगञ्जमा दादुरा-रुबेला विरुद्धको खोप अभियान चलिरहेको छ । खोप अभियान चलेको आठौं दिनसम्म १२८४५ जनाले दादुरा-रुबेला विरुद्धको खोप लगाएका छन् । स्वास्थ्य कार्यालय बाँकेका खोप फोकल पर्सन नरेश श्रेष्ठले समुदायस्तरमा दादुरा फैलिएपछि पुस २२ गतेदेखि सुरु भएको खोप अभियानमा खोप प्रगति प्रतिशत ६९.८५ रहेको बताए । भोली पनि नेपालगञ्जका ९ वटा वडाका १२ खोप केन्द्रबाट खोप लगाइनेछ ।

श्रेष्ठले ६ महिनादेखि १५ बर्षसम्मका बालबालिकालाई खोप लगाइरहेको बताए । खोप लगाउने लक्षित संख्या १८३९० छ । दादुराबाट संक्रमित हुने बालबालिकाको संख्या जिल्लाभर भने १६० पुगेको छ । श्रेष्ठका अनुसार नेपालगञ्जमा १५६, खजुरामा ३ र कोहलपुरमा १ जना दादुराका विरामी भेटिएका हुन् । यी मध्ये ११० जना निको हुँदा ५० जना होम आइसोलेसनमा छन् ।

संक्रमित हुनेमा अधिकांश ५ देखि १० वर्ष उमेर समूहका बालबालिका छन् । ती मध्ये कतिपयले कुनै पनि खोप नलगाएको र धेरैले पूर्ण खोप नलगाएको पाइएको छ । दादुराबाट केही दिन पहिले नेपालगञ्ज-५ का ३१ महिने एक शिशुको मृत्यु भएको थियो ।

प्रकाशित मिति: शुक्रबार, पुस २९, २०७९ २०:५४