नेपालगञ्जमा दादुरा खोप प्रगति प्रतिशत ७५ पुग्यो, दिनदिनै थपिँदै संक्रमित

स्वास्थ्य

गृहपृष्ठ
स्वास्थ्य
नेपालगञ्जमा दादुरा खोप प्रगति प्रतिशत ७५ पुग्यो, दिनदिनै थपिँदै संक्रमित

नेपालगञ्जमा दादुरा खोप प्रगति प्रतिशत ७५ पुग्यो, दिनदिनै थपिँदै संक्रमित

शनिबार, पुस ३०, २०७९ बागेश्वरी पोस्ट

नेपालगञ्ज । नेपालगञ्ज उपमहानगरपालिकामा दादुरा-रुबेला खोपको प्रगति प्रतिशत ७५.२१ पुगेको छ । नेपालगञ्जका दादुरा प्रभावित १२ वटा वडाका लक्षित २२१९० जनसंख्या मध्ये हालसम्म १६६८९ जनाले खोप लगाएका छन् । आज मात्रै ३८४४ बालबालिकाले खोप लगाएको नेपालगञ्ज उपमहानगरपालिकाका खोप फोकल पर्सन जागेश्वर बस्नेतले बताए ।

पुस १२ गते दादुरा देखिएको नेपालगञ्जमा २२ गतेदेखि खोप अभियान चलिरहेको छ । ६ महिनादेखि १५ बर्षसम्मका बालबालिकालाई दादुरा-रुबेला विरुद्धको खोप लगाइरहेको बस्नेतले बताए । दिनदिनै दादुरा विरामी थपिरहेको नेपालगञ्जमा आज मात्रै २० जना नयाँ विरामी थपिएका छन् । यो संगै हालसम्म दादुरा संक्रमितको संख्या १७६ पुगेको छ । यी मध्ये १३१ जना निको भएको र ४४ जना घरमै आइसोलेसनमा रहेको खोप फोकल पर्सन बस्नेतले जानकारी दिए । नेपालगञ्जमा १५ वटा वडामा दादुरा फैलिसकेको छ । दादुराका कारण एक जना अढाई बर्षीय बालकले ज्यान गुमाइसकेका छन् ।

बाँके जिल्लाभर भने दादुरा संक्रमितको संख्या १८० पुगेको छ । नेपालगञ्जमा १७६, खजुरामा ३ र कोहलपुरमा १ जना संक्रमित भेटिएको स्वास्थ्य कार्यालय बाँकेका खोप फोकल पर्सन नरेश श्रेष्ठले जानकारी दिए । भोली माघी पर्वका दिन समेत खोप लगाउने कार्यलाई निरन्तरता दिइने श्रेष्ठले बताए । भोली दुई वटा वडाका दुई खोप केन्द्रबाट खोप लगाइनेछ । वडा नम्बर ३ स्थित उमरान टोल र वडा नम्बर १६ को जयसपुर स्वास्थ्य चौकीमा खोप लगाइने श्रेष्ठले जानकारी दिए । माघ २ गतेबाट भने सबै प्रभावित वडा र खोपको कभरेज नपुगेका वडाहरुबाट खोप लगाउने कार्यलाई तीब्रता दिइने उनले बताए ।

प्रकाशित मिति: शनिबार, पुस ३०, २०७९ १९:३१