२२ हजारलाई दादुरा खोप, भोली नेपालगञ्ज र खजुरामा ४७ खोप केन्द्र

स्वास्थ्य

गृहपृष्ठ
स्वास्थ्य
२२ हजारलाई दादुरा खोप, भोली नेपालगञ्ज र खजुरामा ४७ खोप केन्द्र

२२ हजारलाई दादुरा खोप, भोली नेपालगञ्ज र खजुरामा ४७ खोप केन्द्र

सोमबार, माघ २, २०७९ बागेश्वरी पोस्ट

नेपालगञ्ज । नेपालगञ्जमा २२ हजार बालबालिकालाई दादुरा खोप लगाइएको छ ।

दादुरा-रुबेला खोप अभियान सञ्चालन गरेको एघारौं दिनसम्म ६ महिनादेखि १५ बर्षसम्मका २२०१० बालबालिकाहरुलाई दादुरा रुबेला खोप लगाइएको हो । आज मात्रै ४४४० बालबालिकालाई खोप लगाइएको नेपालगञ्ज उपमहानगरपालिकाका जनस्वास्थ्य निरीक्षक खोप फोकल पर्सन जागेश्वर बस्नेतले बताए । उनका अनुसार आज १६ वटा वडाका १६ स्थानमा खोप केन्द्र सञ्चालन गरिएको थियो ।

भोली नेपालगञ्ज र खजुराका ४७ खोप केन्द्रबाट दादुरा-रुबेला खोप लगाइने स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । नेपालगञ्जका १६ वडामा ३० र खजुराका ८ वडामा १७ खोप केन्द्र सञ्चालन हुनेछन् । श्रेष्ठका अनुसार भोली वडा नम्बर २, ३, ६, ९, १०, ११, १२, १३, १६, १७, १८, १९, २०, २१, २२ र २३ मा खोप केन्द्र सञ्चालन गरेर खोप लगाइनेछ ।

यहाँका २३ वडा मध्ये बाँकी ७ वटा वडाका खोप लगाउन छुट बालबालिकाहरूलाई समेत वडाका स्वास्थ्यकर्मीमार्फत 'खोज र खोप अभियान' सञ्चालनमार्फत दादुरा रुबेला विरुद्धको खोप सेवा प्रदान गरिनेछ । वडा नम्बर १, ४, ५, ७, ८, १४ र १५ मा खोप प्रगति ९५ प्रतिशत माथि छ ।

पुस १२ गतेदेखि देखिएको दादुराबाट नेपालगञ्जमा हालसम्म १८९ बालबालिका संक्रमित भइसकेका छन् । यी मध्ये १३९ जना निको भएका छन् । ४९ जना होम आइसोलेसनमा छन् । एक जनाको मृत्यु भइसकेको छ ।

प्रकाशित मिति: सोमबार, माघ २, २०७९ २१:०४