नेपालगञ्जमा ३१ हजार बालबालिकालाई दादुरा खोप, संक्रमित १९० पुगे

स्वास्थ्य

गृहपृष्ठ
स्वास्थ्य
नेपालगञ्जमा ३१ हजार बालबालिकालाई दादुरा खोप, संक्रमित १९० पुगे

नेपालगञ्जमा ३१ हजार बालबालिकालाई दादुरा खोप, संक्रमित १९० पुगे

मंगलबार, माघ ३, २०७९ बागेश्वरी पोस्ट

नेपालगञ्ज । नेपालगञ्जमा ३१ हजार बालबालिकालाई दादुरा खोप लगाइएको छ ।

दादुरा-रुबेला खोप अभियान सञ्चालन गरेको बाह्रौं दिनसम्म ६ महिनादेखि १५ बर्षसम्मका ३१०४२ बालबालिकाहरुलाई दादुरा-रुबेला खोप लगाइएको हो । जुन ७२.२३ प्रतिशत प्रगति हो । आज मात्रै ९०३२ बालबालिकालाई खोप लगाइएको नेपालगञ्ज उपमहानगरपालिकाका जनस्वास्थ्य निरीक्षक खोप फोकल पर्सन जागेश्वर बस्नेतले बताए ।

उनका अनुसार आज १६ वटा वडामा ३० वटा खोप केन्द्र सञ्चालन गरिएको थियो । वडा नम्बर २, ३, ६, ९, १०, ११, १२, १३, १६, १७, १८, १९, २०, २१, २२ र २३ मा खोप केन्द्र सञ्चालन गरेर खोप लगाइएको हो । भोली पनि यी वडामा ३६ खोप केन्द्र सञ्चालन हुनेछन् ।

यहाँका २३ वडा मध्ये बाँकी ७ वटा वडाका खोप लगाउन छुट बालबालिकाहरूलाई समेत वडाका स्वास्थ्यकर्मीमार्फत 'खोज र खोप अभियान' सञ्चालनमार्फत दादुरा-रुबेला विरुद्धको खोप सेवा प्रदान गरिनेछ । वडा नम्बर १, ४, ५, ७, ८, १४ र १५ मा खोप प्रगति ९५ प्रतिशत माथि छ ।

पुस १२ गतेदेखि देखिएको दादुराबाट नेपालगञ्जमा हालसम्म १९० बालबालिका संक्रमित भइसकेका छन् । यी मध्ये १४७ जना निको भएका छन् । ४१ जना होम आइसोलेसनमा छन् । एक जनाको मृत्यु भइसकेको छ ।

प्रकाशित मिति: मंगलबार, माघ ३, २०७९ २१:५४

प्रतिक्रिया दिनुहोस्