बाँकेमा ९० प्रतिशतलाई दादुरा खोप, भोलीदेखि डुडुवामा पनि लगाइँदै

स्वास्थ्य

गृहपृष्ठ
स्वास्थ्य
बाँकेमा ९० प्रतिशतलाई दादुरा खोप, भोलीदेखि डुडुवामा पनि लगाइँदै

बाँकेमा ९० प्रतिशतलाई दादुरा खोप, भोलीदेखि डुडुवामा पनि लगाइँदै

दादुरा संक्रमित बालबालिका २४६ पुगे

शुक्रबार, माघ ६, २०७९ बागेश्वरी पोस्ट

नेपालगञ्ज । बाँकेका दादुरा प्रभावित क्षेत्रमा खोप लगाउने कार्यलाई निरन्तरता दिइएको छ । नेपालगञ्ज उपमहानगरपालिका, नरैनापुर गाउँपालिका र खजुरा गाउँपालिकामा आज पनि खोप लगाइएको छ । २५ वडामा सञ्चालन गरिएका ३२ खोप केन्द्रमार्फत खोप लगाइएको हो ।

नेपालगञ्जका ११ वडाका १३ खोप केन्द्र, नरैनापुरका ६ वडाका ११ खोप केन्द्र र खजुराका ८ वडाका ८ खोप केन्द्रबाट खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । बाँकेमा हालसम्म खोप प्रगति ९०.४ प्रतिशत पुगेको छ । नेपालगञ्जमा लक्ष्य भन्दा बढी १०३.३१ प्रतिशत, खजुरामा ९५.६७ प्रतिशत र नरैनापुरमा ४३.९४ प्रतिशत खोप प्रगति रहेको छ ।

नेपालगञ्जमा ४४४०२ जनालाई दादुरा-रुबेला खोप लगाइएको खोप फोकल पर्सन जागेश्वर बस्नेतले जानकारी दिए । भोली वडा नम्बर ६, ११, १६ र १८ का ४ वटा खोप केन्द्रबाट खोप लगाइनेछ । खजुरामा १७६५९ जनालाई खोप लगाइएको खजुराका स्वास्थ्य शाखा प्रमुख दिपक ढकालले बताए । भोली पनि खजुराका ८ वडाका २० खोप केन्द्रबाट खोप लगाउने कार्यलाई निरन्तरता दिइनेछ । नरैनापुर स्वास्थ्य शाखाका प्रमुख नागेन्द्रकुमार शाहका अनुसार नरैनापुरमा भने ६१६० जना बालबालिकालाई खोप लगाइएको छ । भोली पनि यहाँका ६ वटै वडामा ११ खोप केन्द्र सञ्चालन गरेर खोप लगाइनेछ ।

भोलीदेखि डुडुवा गाउँपालिकाका ६ वटै वडामा ११ वटा खोप केन्द्रमार्फत खोप लगाउने कार्यको सुरुवात गरिँदैछ । दादुरा-रुबेला खोप जिल्लामा पर्याप्त मात्रामा रहेको स्वास्थ्य कार्यालय बाँकेका खोप फोकल पर्सन श्रेष्ठले बताए । ६ महिनादेखि १५ बर्षसम्मका बालबालिकालाई खोप लगाइँदैछ ।

नेपालगञ्जमा मात्रै हालसम्म २०० जना बालबालिका दादुरा संक्रमित भएका छन् । यी मध्ये १६९ जना निको भएका छन् भने ३० जना घरमा आइसोलेसनमा छन् । एक जनाको मृत्यु भएको छ । बाँकेमा २४६ जना संक्रमित छन् । यी मध्ये १८४ जना निको भएका छन् । ६१ जना घरमै उपचारमा छन् ।

प्रकाशित मिति: शुक्रबार, माघ ६, २०७९ २०:३६

प्रतिक्रिया दिनुहोस्