बाँकेमा दादुरा संक्रमित बालबालिका २६५ पुगे, २०८ जना निको

स्वास्थ्य

गृहपृष्ठ
स्वास्थ्य
बाँकेमा दादुरा संक्रमित बालबालिका २६५ पुगे, २०८ जना निको

बाँकेमा दादुरा संक्रमित बालबालिका २६५ पुगे, २०८ जना निको

आइतबार, माघ ८, २०७९ बागेश्वरी पोस्ट

नेपालगञ्ज । बाँकेमा २६५ जना बालबालिका दादुरा संक्रमित भएका छन् । आज थप ५ जना नयाँ विरामी फेला परेका छन् । पुस १२ गतेदेखि फैलिएको दादुरा जिल्लाका पाँच वटा पालिकामा देखिएको छ ।

नेपालगञ्ज, नरैनापुर, खजुरा, डुडुवा र कोहलपुरमा दादुरा देखिएको हो । संक्रमित मध्ये २०८ जना निको भएका छन् । ५६ जना घरमै उपचारमा रहेको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए । नेपालगञ्जमा मात्रै हालसम्म २०५ जना बालबालिका दादुरा संक्रमित भएका छन् । यी मध्ये १७८ जना निको भएका छन् भने २६ जना घरमा आइसोलेसनमा रहेको नेपालगञ्ज उपमहानगरपालिकाका फोकल पर्सन जागेश्वर बस्नेतले बताए । एक जनाको भने मृत्यु भइसकेको छ ।

दादुरा फैलिएपछि पुस २२ गतेदेखि खोप अभियान जारी छ । ६ महिनादेखि १५ बर्षसम्मका बालबालिकालाई खोप लगाइँदैछ । नेपालगञ्जमा लक्ष्य भन्दा बढी १०४.४७ प्रतिशतलाई खोप लगाइएको छ । नेपालगञ्जमा ४४८९७ जनालाई दादुरा-रुबेला खोप लगाइएको खोप फोकल पर्सन बस्नेतले जानकारी दिए । यहाँ लक्ष्य पूरा भइसकेकाले अब २३ वटै वडाका नियमित मासिक खोप केन्द्रहरुमार्फत खोप लगाइनेछ । डुडुवामा दुई दिनमा ३८९० जना बालबालिकालाई दादुरा-रुबेला खोप लगाइएको स्वास्थ्य शाखा प्रमुख धनबहादुर बुढाले बताए । नरैनापुर स्वास्थ्य शाखाका प्रमुख नागेन्द्रकुमार शाहका अनुसार नरैनापुरमा १२२५८ जना बालबालिकालाई खोप लगाइएको छ । जुन लक्ष्यको ८७.४३ प्रतिशत हो ।

प्रकाशित मिति: आइतबार, माघ ८, २०७९ २१:०२