बाँकेमा दादुराको संक्रमण कायमै

स्वास्थ्य

गृहपृष्ठ
स्वास्थ्य
बाँकेमा दादुराको संक्रमण कायमै

बाँकेमा दादुराको संक्रमण कायमै

बिहीबार, माघ १९, २०७९ बागेश्वरी पोस्ट

नेपालगञ्ज । बाँकेमा दादुरा रोगको संक्रमण कायमै रहेको छ । अहिलेसम्म तीन सय नौ बालबालिकामा दादुरा रोगको संक्रमण पुष्टि भएको छ ।

जिल्ला स्वास्थ्य कार्यालयका खोप स्रोत व्यक्ति नरेश श्रेष्ठका अनुसार, दादुरा संक्रमणबाट सबैभन्दा बढी नेपालगञ्जका बालबालिका प्रभावित भएका छन् । दादुराको संक्रमणबाट अहिलेसम्म नेपालगञ्जमा एक जनाको मृत्यु भइसकेको छ । यहाँ अहिलेसम्म दुई सय १३ सङ्क्रमित फेला परेका छन् ।

हालसम्म नरैनापुरमा ४१, खजुरा गाउँपालिकामा २१, डुडुवामा १८, कोहलपुरमा नौ र राप्तीसोनारीमा सात जनालाई दादुरा संक्रमण पुष्टि भएको छ । यी मध्ये १० जनाको उपचार भइरहेको छ । नेपालगञ्जका एक सङ्क्रमित अस्पताल भर्ना भएका छन् ।

यसैगरी राप्तीसोनारीका सात र कोहलपुरका दुई बालबालिका ‘होम आइसोलेशन’ मा रहेका श्रेष्ठले जानकारी दिए । दिनहुँ संक्रमण फैलिरहँदा बालबालिका निको हुने क्रम पनि चलिरहेको छ । अहिलेसम्म बाँकेमा दुई सय ९८ जना निको भइसकेका छन् । नेपालगञ्जका दुई सय ११, नरैनापुरका ४१, खजुराका २१, डुडुवाका १८ र कोहलपुरका सात जना बालबालिका निको भइसकेको स्वास्थ्य कार्यालयले जनाएको छ ।

नेपालगञ्जमा संक्रमण केही कम भए पनि ग्रामीण क्षेत्रतिर बढिरहेकोले दादुरा संक्रमण रोक्न ठाउँ-ठाउँमा खोप कार्यक्रम सञ्चालन भइरहेको नेपालगञ्ज उपमहानगरपालिका स्वास्थ्य महाशाखा प्रमुख रामबहादुर चन्दले बताए । रासस

प्रकाशित मिति: बिहीबार, माघ १९, २०७९ १४:११

प्रतिक्रिया दिनुहोस्