डुडुवामा हात्तीपाइले आमऔषधि सेवन अभियान सुरु

स्वास्थ्य

गृहपृष्ठ
स्वास्थ्य
डुडुवामा हात्तीपाइले आमऔषधि सेवन अभियान सुरु

डुडुवामा हात्तीपाइले आमऔषधि सेवन अभियान सुरु

सोमबार, फागुन १, २०७९ बागेश्वरी पोस्ट

डुडुवा -बाँके_ । राष्ट्रिय हात्तीपाइले रोग निवारण कार्यक्रम अन्तर्गत १३औं आम औषधि सेवन अभियान यस वर्ष सुरु भएको छ । अभियान सफल बनाउनका लागि डुडुवा गाउँपालिकाले आज पालिका स्तरीय योजना तर्जुमा गोष्ठी गरेको छ ।

कार्यक्रममा यस वर्ष डुडुवामा शतप्रतिशत मानिसलाई औषधि सेवन गराउन समुदायमा सचेतना, गाउँका अगुवाहरुको उपस्थिति, जनशक्ति परिचालन, औषधि खुवाउने समयको निर्धारण, अनुगमनको कार्यलाई प्रभावकारी बनाउने विशेष रणनीति निर्माण गरिएको हो । औषधि सेवन कार्यक्रमलाई सफल बनाउन निर्माण गरिएको रणनीति अनुसार कार्ययोजनालाई कार्यान्वयन गरिने गाउँपालिका स्वास्थ्य शाखा प्रमुख धनबहादुर बुढाले बताए । उनका अनुसार डुडुवामा यही फागुन ११ गतेदेखि अभियान संचालन गर्न लागिएको हो ।

करिब एक हप्तासम्म संचालन गरिने उक्त अभियानमा ६५ जना स्वास्थ्यकर्मी, ५९ जना महिला स्वास्थ्य स्वयंसेविकालाई परिचालन गरिनेछ । उचाईका आधारमा आइभर मेट्रिन, डिसी र अल्वेन्डाजोल नामक औषधि खुवाउने शाखा प्रमुख बुढाले बताए । ग्रामीण क्षेत्रमा अशिक्षाका कारण अधिकांश नागरिकले औषधि सेवन नगरेका कारण लक्ष्य हासिल गर्न नसकिएको हो । गत वर्ष डुडुवामा ७८ प्रतिशत नागरिकले मात्र औषधि सेवन गरेका थिए । यस वर्ष औषधि सेवनका लागि जनप्रतिनिधि, दलका प्रतिनिधि, समुदायका अगुवा लगायतले विशेष भूमिका खेल्ने जोड दिइएको छ ।

डुडुवामा गर्भवती र सुत्करी बाहेक ४१ हजार जनसंख्यालाई औषधि खुवाउने लक्ष्य लिएको स्वास्थ्य शाखा सहसंयोजक बीरेन्द्र घलेले बताए । उनका अनुसार दुई वर्ष भन्दा माथिका मानिसलाई यो औषधि खुवाइनेछ । कार्यक्रममा वडाध्यक्षहरु दुर्गाप्रसाद बर्मा, आमोद तिवारी, सगिर खाँ, झंकबहादुर थापा, मोहनराम मिश्र, कार्यपालिका सदस्य शिवकुमार जयसवाल, स्वास्थ्य कार्यालय बाँकेका फोकल पर्सन दुर्गा गौतम, गाउँपालिकाका प्रमुख प्रशासकीय अधिकृत कृष्णप्रसाद पौडेल, विभिन्न शाखाका प्रमुख, शिक्षक, स्वास्थ्य चौकी इन्चार्ज लगायतको सहभागिता रहेको थियो ।

प्रकाशित मिति: सोमबार, फागुन १, २०७९ २१:१०