बाँकेमा हात्तीपाइले विरुद्धको औषधि सेवन अभियान फागुन ११ गतेदेखि

स्वास्थ्य

गृहपृष्ठ
स्वास्थ्य
बाँकेमा हात्तीपाइले विरुद्धको औषधि सेवन अभियान फागुन ११ गतेदेखि

बाँकेमा हात्तीपाइले विरुद्धको औषधि सेवन अभियान फागुन ११ गतेदेखि

बुधबार, फागुन ३, २०७९ बागेश्वरी पोस्ट

नेपालगन्ज । बाँकेमा हात्तीपाइले रोग विरुद्धको औषधि सेवन अभियान यही फागुन ११ गतेदेखि सुरु हुने भएको छ । स्वास्थ्य कार्यालय बाँकेले आज नेपालगन्जमा आयोजना गरेको जिल्ला स्तरीय पत्रकार अन्तरिक्रया कार्यक्रममा अभियानको तयारीबारे जानकारी गराइएको हो।

यो पटक जिल्लामा ६ लाख १६ हजार ६९५ जनालाई औषधि खुवाउने लक्ष्य रहेको स्वास्थ्य कार्यालय बाँकेका हात्तीपाइले रोग फोकल पर्सन दुर्गा गौतमले जानकारी दिइन् । बाँके हात्तीपाइले रोगको उच्च जोखिममा रहेकाले लक्षित समूहका सबै व्यक्तिहरुलाई औषधि सेवन गर्न उनको आग्रह छ ।

नेपालगन्ज उपमहानगरपालिकामा एक लाख ७० हजार ५९८ जना, कोहलपुर नगरपालिकामा एक लाख २ हजार ९०४ जना, खजुरा गाउँपालिकामा ६५ हजार ३०७ जनालाई औषधि खुवाउने लक्ष्य छ । त्यसैगरी जानकी गाउँपालिकामा ४७ हजार ७३३, डुडुवा गाउँपालिकामा ४४ हजार १४४, नरैनापुर गाउँपालिकामा ४४ हजार ८०७, बैजनाथ गाउँपालिकामा ७१ हजार ८६१ र राप्तीसोनारी गाउँपालिकामा ६९ हजार ३४१ जनालाई हात्तीपाइले रोग विरुद्धको औषधि खुवाउने लक्ष्य रहेको फोकलपर्सन गौतमले जानकारी दिइन् ।

नेपालगन्ज उपमहानगरपालिकामा ५० प्रतिशत मानिसले मात्रै औषधि खाएको तथ्यांक स्वास्थ्य कार्यालयसँग छ । त्यसैगरी कोहलपुर र डुडुवामा ७८-७८, खजुरामा ७६, राप्तीसोनारी र बैजनाथमा ७३-७३, नरैनापुरमा ७४ प्रतिशतले औषधि सेवन गर्दा जानकी गाउँपालिकामा भने सबैभन्दा धेरै ८० प्रतिशतले औषधि सेवन गरेका थिए ।

खानेले औषधि खाइरहने र नखानेले औषधि नखाइदिने गरेका कारण बाँकेमा हात्तीपाइले रोग विरुद्धको अभियान प्रभावकारी हुन सकेको छैन । जसले औषधि सेवन गर्दैन त्यसकै कारण औषधि खाने मानिसहरु पनि हात्तीपाइलेको जोखिममा पर्ने गरेका छन् । बाँकेमा आर्थिक वर्ष २०६७-०६८ बाट हात्तीपाइले रोग विरुद्धको औषधि खुवाउन सुरु गरिएको हो ।

उक्त वर्ष जिल्लाको कभरेज ९१ प्रतिशत थियो । पहिलो वर्ष भएको केही असावधानी र वास्तविकता बुझाउन नसक्दा भएको दुर्घटनाले त्यसपछि औषधि सेवनको कभरेज घट्दै गएको हो । गत वर्ष बाँकेमा ६८ प्रतिशतले मात्रै औषधि सेवन गरेका थिए । स्वास्थ्य कार्यालय बाँकेका प्रमुख सुनिता पौडेलले हात्तीपाइले रोग विरुद्धको अभियानलाई प्रभावकारी गराउन मिडियाकर्मी, जनप्रतिनिधि, राजनीतिक दल तथा बुद्धिजीवि सबै वर्गको भूमिका आवश्यक रहेको भन्दै यो अभियानलाई सफल बनाउन आग्रह गरिन् ।

बाँके हात्तीपाइले रोगको उच्च जोखिममा रहेकाले औषधि सेवन नै यसको न्यूनीकरण भएको उनको भनाई छ । उनले पाँच वर्ष लगातार औषधि खुवाएपछि प्रि टाक्स सर्भे गरेर अर्को वर्ष औषधि खुवाएर निवारण गर्ने रणनीति असफल भएपछि १३ औं पटक औषधि खुवाउन लागिएको बताइन् ।

प्रकाशित मिति: बुधबार, फागुन ३, २०७९ १८:२५