पूर्ण खोप सुनिश्चितता र दिगोपनामा निरन्तरताका लागि कार्ययोजना बनाइँदै

स्वास्थ्य

गृहपृष्ठ
स्वास्थ्य
पूर्ण खोप सुनिश्चितता र दिगोपनामा निरन्तरताका लागि कार्ययोजना बनाइँदै

पूर्ण खोप सुनिश्चितता र दिगोपनामा निरन्तरताका लागि कार्ययोजना बनाइँदै

शुक्रबार, फागुन १९, २०७९ बागेश्वरी पोस्ट

नेपालगञ्ज । नेपालगञ्जमा पूर्ण खोप सुनिश्चितता र दिगोपनामा निरन्तरताका लागि कार्ययोजना तयार गर्न वडा वडामा कार्यशाला गोष्ठी भइरहेका छन् । युनिसेफको सहयोगमा नेपालगञ्ज उपमहानगरपालिका स्वास्थ्य महाशाखाले सबै वडाका स्वास्थ्य केन्द्रहरुमा पुगेर कार्यशाला गोष्ठी गरिरहेको हो ।

वडा स्तरदेखि नै छुट बच्चाहरुको खोेजी र खोप प्रदान गर्ने नियमित प्रक्रियाको विकास गर्ने उद्देश्यले कार्यशाला गोष्ठी गरिरहेको जनस्वास्थ्य निरीक्षक जागेश्वर बस्नेतले बताए । नियमित खोप छुट बच्चाहरु, कारणको पहिचान र विश्लेषण गर्ने गरी कार्यशाला गोष्ठीबाटै कार्ययोजना बनाइरहेको बस्नेतले बताए । पूर्ण खोप कार्यक्रमको लागि महिला सामुदायिक स्वास्थ्य स्वयंसेविकाहरुको क्षमता अभिबृद्धि गर्ने उद्देश्य पनि लिइएको बस्नेतले जानकारी दिए । वडास्तरमा वडा अध्यक्ष संयोजक रहने गरी बनेको खोप समन्वय समितिलाई अझ सक्रिय बनाएर अनुगमनका लागि उत्प्रेरित गर्ने उद्देश्य पनि छ ।

यसैक्रममा आज नेपालगञ्जका दुई वडाहरुमा कार्यशाला गोष्ठी गरिएका छन् । वडा नम्बर ६ र वडा नम्बर १९ मा गोष्ठी गरिएको जनस्वास्थ्य निरीक्षक तेज वलीले बताए । वडा नम्बर ६ मा वडा अध्यक्ष एवम् खोप समन्वय समिति संयोजक समिरप्रताप सिंहको अध्यक्षतामा सम्पन्न कार्यशालामा जनस्वास्थ्य निरीक्षक बस्नेतले अभियाननको उद्देश्यबारे प्रस्तुतिकरण गरेका थिए । गोष्ठीमा युनिसेफका नवीन सुवेदीले कार्ययोजना निर्माण, कार्यान्वयन र यसको प्रभावकारिताबारे जानकारी गराएका थिए । कार्यशालामा वडा अध्यक्ष, वडा सदस्यहरु, स्वास्थ्य स्वयंसेविका लगायत उपस्थित थिए । यसअघि हिजो वडा नम्बर २३ मा पनि कार्यशाला गोष्ठी गरिएको जनस्वास्थ्य निरीक्षक गोरखनाथ योगीले बताए ।

No description available.