नरैनापुरमा एक दिने निःशुल्क स्वास्थ्य शिविर सम्पन्न

स्वास्थ्य

गृहपृष्ठ
स्वास्थ्य
नरैनापुरमा एक दिने निःशुल्क स्वास्थ्य शिविर सम्पन्न

नरैनापुरमा एक दिने निःशुल्क स्वास्थ्य शिविर सम्पन्न

शनिबार, फागुन २०, २०७९ बागेश्वरी पोस्ट

नरैनापुर । बाँकेको नरैनापुर गाउँपालिकामा असल छिमेकी सामुदायिक हस्पिटलको आयोजना र नरैनापुर गाउँपालिकाको समन्वयमा एक दिने निःशुल्क स्वास्थ्य शिविर आज सम्पन्न भएको छ । उक्त शिविरबाट तीन सय भन्दा बढी नागरिक लाभान्वित भएका छन् । प्राथमिक स्वास्थ्य केन्द्र लक्ष्मणपुरमा सम्पन्न शिविरमा ३०० जनाको नाक, कान, घाँटीको उपचार, २०० जनाको सामान्य चेकजाँच गरी औषधि बितरण गरिएको थियो ।

नरैनापुर गाउँपालिका अध्यक्ष इश्तियाक अहमद शाहको स्वास्थ्य परिक्षण गर्दै शिविरको उद्घाटन गरिएको थियो । अध्यक्ष शाहले नागरिकको स्वास्थ्यप्रति गम्भीर र चिन्तित रहेकाले सोही मर्म अनुसार पालिकामा काम भइरहेको बताए । उनले जनताको सबैभन्दा महत्वपूर्ण र पहिलो आवश्यकता सहजरुपमा स्वास्थ्योपचार गर्न पाउनु रहेकोले पालिकाबाट प्रदान हुँदै आएको स्वास्थ्य सेवालाई अझ गुणस्तरीय बनाउँदै लैजाने बताए । अध्यक्ष शाहले नरैनापुरमा आयोजना भएको निःशुल्क शिविरबाट फाइदा लिन आग्रह गरे ।

असल छिमेकी सामुदायिक हस्पिटलका संचालक सदस्य डक्टप्रसाद धितालको अध्यक्षतामा भएको शिविरको उद्घाटन नरैनापुर गाउँपालिकाका अध्यक्ष इश्तियाक अहमद शाहले गरेका थिए भने कार्यक्रममा वडा नं २ का अध्यक्ष मसूद अहमद शाह, वडा नं ३ का अध्यक्ष अजय मिश्रा, नाक, कान, घाँटीका बिशेषज्ञ डा. प्रकाश बस्याल, लक्ष्मणपुर प्राथमिक स्वास्थ्य केन्द्रका प्रमुख डा. सूर्यप्रकाश शाह लगायतको सहभागिता रहेको थियो । कार्यक्रमको सञ्चालन पत्रकार गजेन्द्र गुरुङ्गले गरेका थिए ।

प्रकाशित मिति: शनिबार, फागुन २०, २०७९ २१:००