पूर्ण खोप सुनिश्चितताका लागि वडा वडामा अभिमुखीकरण

स्वास्थ्य

गृहपृष्ठ
स्वास्थ्य
पूर्ण खोप सुनिश्चितताका लागि वडा वडामा अभिमुखीकरण

पूर्ण खोप सुनिश्चितताका लागि वडा वडामा अभिमुखीकरण

आइतबार, फागुन २१, २०७९ बागेश्वरी पोस्ट

नेपालगञ्ज । नेपालगञ्जमा पूर्ण खोप सुनिश्चितता र दिगोपनामा निरन्तरताका लागि कार्ययोजना तयार गर्न वडा वडामा कार्यशाला गोष्ठी भइरहेका छन् । युनिसेफको सहयोगमा नेपालगञ्ज उपमहानगरपालिका स्वास्थ्य महाशाखाले सबै वडाका स्वास्थ्य केन्द्रहरुमा पुगेर कार्यशाला गोष्ठी गरिरहेको हो ।

वडा स्तरदेखि नै छुट बच्चाहरुको खोजी र खोप प्रदान गर्ने नियमित प्रक्रियाको विकास गर्ने उद्देश्यले कार्यशाला गोष्ठी गरिरहेको नेपालगञ्ज उपमहानगरपालिका स्वास्थ्य महाशाखा प्रमुख रामबहादुर चन्दले बताए । नियमित खोप छुट बच्चाहरु, कारणको पहिचान र विश्लेषण गर्ने गरी कार्यशाला गोष्ठीबाटै कार्ययोजना बनाइरहेको चन्दले बताए । पूर्ण खोप कार्यक्रमको लागि महिला सामुदायिक स्वास्थ्य स्वयंसेविकाहरुको क्षमता अभिबृद्धि गर्ने उद्देश्य पनि लिइएको जनस्वास्थ्य निरीक्षक जागेश्वर बस्नेतले जानकारी दिए । वडास्तरमा वडा अध्यक्ष संयोजक रहने गरी बनेको खोप समन्वय समितिलाई अझ सक्रिय बनाएर अनुगमनका लागि उत्प्रेरित गर्ने उद्देश्य पनि छ ।

यसैक्रममा आज नेपालगञ्जका तीन वडाहरुमा कार्यशाला गोष्ठी गरिएका छन् । वडा नम्बर ५, ८ र १३ मा गोष्ठी गरिएको जनस्वास्थ्य निरीक्षक तेज वलीले बताए । वडा नम्बर ५ मा वडा अध्यक्ष एवम् खोप समन्वय समिति संयोजक सराफत हुसेन शेष, वडा नम्बर ८ मा वडा अध्यक्ष एवम् खोप समन्वय समिति संयोजक विवेक बाजपेयी र वडा नम्बर १३ मा वडा अध्यक्ष एवम् खोप समन्वय समिति संयोजक सुरेश सिंह ठाकुरको अध्यक्षतामा कार्यशाला गरिएको जनस्वास्थ्य निरीक्षक गोरखनाथ योगीले बताए । कार्यशालामा वडा अध्यक्ष, वडा सदस्यहरु, स्वास्थ्य स्वयंसेविका लगायत उपस्थित थिए । यसअघि वडा नम्बर ६, १९ र २३ मा कार्यशाला गोष्ठी गरिसकिएको छ ।

प्रकाशित मिति: आइतबार, फागुन २१, २०७९ १८:४९

प्रतिक्रिया दिनुहोस्