हिम पहिरोमा ३ नेपालीसहित ७ पर्यटकको मृत्यु

स्वास्थ्य

गृहपृष्ठ
स्वास्थ्य
हिम पहिरोमा ३ नेपालीसहित ७ पर्यटकको मृत्यु

हिम पहिरोमा ३ नेपालीसहित ७ पर्यटकको मृत्यु

२ दर्जन बढी पर्यटकको उद्दार

बुधबार, चैत २२, २०७९ बागेश्वरी पोस्ट

नेपालगन्ज । हिम पहिरोमा परेर ३ जना नेपालीसहित ७ जना पर्यटकको मृत्यु भएको छ । भारतको सिक्किमको नाथुला क्षेत्रमा मंगलबार हिम पहिरोमा३ नेपालीसहित ७ पर्यटकको मृत्यु भएको हो ।

गान्तोक- नाथुला जेएनएम सडकमा गएको भीषण हिम पहिरोमा परेर उनीहरूको मृत्यु भएको हो । मृत्यु हुनेमा रुपन्देहीका मुना शाह श्रेष्ठ र चितवनका शिवप्रसाद लामिछाने र आशिका ढकाल रहेका छन् ।

साथै घटनामा अन्य ४ जना भारतीयको पनि मृत्यु भएको छ । मृत्यु हुनेहरूमा उत्तर प्रदेशका बल सिंह र रेव्या सिंह, कोलकाताका सौरभ रोय चौधरी र प्रितम मात्ये रहेका छन् ।

हिम पहिरो गएसँगै ६ पर्यटकहरू सहित २३ जनालाई जीवितै उद्धार गरिएको थियो । खराब मौसमको कारण साँझ पछि उद्धार कार्य स्थगित गरिएको थियो ।

सरकारी अधिकारीहरूले उद्धार गरिएका १४ जना पर्यटकमा नेपाल, उत्तर प्रदेश, पश्चिम बङ्गाल र दिल्लीका बासिन्दा रहेको बताएका छन्। उनीहरू सबैको उपचार भइरहेको छ ।

जीवित उद्धार गरिएकामध्ये कम्तीमा ८ जनाको अवस्था गम्भीर रहेको हिन्दुस्तान टाइम्सले जनाएको छ । हिम पहिरोमा अझै धेरै पुरिएको हनसक्ने बताइएको छ । थप उद्दार कार्य जारी छ । नाथुला पास सिक्किम र तिब्बत बीचको रणनीतिक महत्त्वको क्षेत्र हो । यसलाई पर्यटकको आकर्षक गन्तव्यको रूपमा मानिन्छ ।