नेपालगञ्जमा निःशुल्क आयुर्वेद शिविर, ३ सय ५० बढीको स्वास्थ्य परीक्षण

स्वास्थ्य

गृहपृष्ठ
स्वास्थ्य
नेपालगञ्जमा निःशुल्क आयुर्वेद शिविर, ३ सय ५० बढीको स्वास्थ्य परीक्षण

नेपालगञ्जमा निःशुल्क आयुर्वेद शिविर, ३ सय ५० बढीको स्वास्थ्य परीक्षण

शनिबार, चैत २५, २०७९ बागेश्वरी पोस्ट

नेपालगञ्ज । नेपालगञ्जमा आज निःशुल्क विशेषज्ञ आयुर्वेद तथा उपचारात्मक योग शिविर सम्पन्न भएको छ । नेपालगञ्ज उपमहानगरपालिका आयुर्वेद शाखाको आयोजना र नेपालगञ्ज आयुर्वेद जनरल हस्पिटलको प्राविधिक सहयोगमा भएको उपचारात्मक योग शिविरमा ३ सय ५० भन्दा बढीले स्वास्थ्य परीक्षण गराएका छन् ।

नेपालगञ्ज उपमहानगरपालिकाका नगर प्रमुख प्रशान्त विष्टले शिविरको ब्यानर पढेर उद्घाटन गरेका थिए । उद्घाटन समारोहमा बोल्दै नगर प्रमुख विष्टले निःशुल्क विशेषज्ञ आयुर्वेद शिविरलाई उपमहानगरको २३ वटै वडामा संचालन गरिने बताए । उनले भने,‘नागरिकलाई स्वस्थ राख्न हाम्रो परम्परागत उपचार पद्धति आयुर्वेदको महत्वपूर्ण भूमिका रहन्छ । यो कार्यक्रम निकै राम्रो छ । आज १० नम्बर वडाबाट यसको सुरुवात भएको छ । अब हामीले सबै वडामा शिविरको आयोजना गर्नेछौं ।’ विष्टले नेपालगञ्जमा अवैधानिक रुपमा आयुर्वेदको उपचार गरिने गरेको पाइएको भन्दै भारतीय नक्कली डाक्टरले बिरामीलाई भ्रमित पार्ने काम गरेकोले त्यसलाई नियन्त्रण गर्न उपमहानगरपालिकाले काम गर्ने बताए ।

संविधान सभा सदस्य एवम् नेपालगञ्ज आयुर्वेद जनरल हस्पिटलका अध्यक्ष मैकुलाल वाल्मिकीले आमनागरिकमा आयुर्वेदको बारेमा सकारात्मक सन्देश प्रवाह गर्न शिविरले महत्वपूर्ण भुमिका खेलेको बताए । नेपालगञ्जमा पछिल्लो समय आयुर्वेद उपचार पद्धतिको बारेमा सकारात्मक भावनाको विकास भएको भन्दै भारतीय केही नक्कली डाक्टरका कारण बिरामीको स्वास्थ्यमा गम्भिर समस्या देखिँदै गएको बताए ।

निःशुल्क विशेषज्ञ आयुर्वेद तथा उपचारात्मक योग शिविरको उद्घाटन कार्यक्रममा नेपाल आयुर्वेद चिकित्सा परिषदका रजिष्टार तथा पंचकर्म विज्ञ डा. निर्मल भुषाल, बाँकेका प्रमुख जिल्ला अधिकारी विपिन आचार्य, नेपालगञ्ज उपमहानगरपालिकाका प्रमुख प्रशासकीय अधिकृत शिवप्रसाद रिजाल, नेपालगञ्ज मेडिकल कलेजका निर्देशक डा. सन्तोष शर्मा, नेपालगञ्ज आयुर्वेद जनरल हस्पिटलका प्रमुख कार्यकारी अधिकृत प्रभाकर मिश्र, बाँके आयुर्वेद स्वास्थ्य केन्द्र प्रमुख डा. अनिलकुमार चौधरी, नेपालगञ्ज उपमहानगरपालिका आयुर्वेद शाखा प्रमुख बज्रभुषण झा लगायतको उपस्थिति रहेको थियो ।

प्रकाशित मिति: शनिबार, चैत २५, २०७९ २१:५७