बाँकेमा राष्ट्रिय भिटामिन 'ए' अभियानमा गम्भीर लापर्वाही, अभियान रोकियो

स्वास्थ्य

गृहपृष्ठ
स्वास्थ्य
बाँकेमा राष्ट्रिय भिटामिन 'ए' अभियानमा गम्भीर लापर्वाही, अभियान रोकियो

बाँकेमा राष्ट्रिय भिटामिन 'ए' अभियानमा गम्भीर लापर्वाही, अभियान रोकियो

करिब ९० हजार बालबालिका भिटामिन 'ए' खानबाट बञ्चित

मंगलबार, वैशाख ५, २०८० बागेश्वरी पोस्ट

नेपालगञ्ज । बाँकेमा भोलिदेखि सुरु हुने भनिएको राष्ट्रिय भिटामिन ‘ए’ अभियान रोकिएको छ । प्रदेश सरकारले पठाएको भिटामिन ‘ए’ क्याप्सुल गुणस्तरहीन भएको पाइएपछि लुम्विनी प्रदेश स्वास्थ्य मन्त्रालय प्रदेश स्वास्थ्य निर्देशनालयले पूर्व सन्ध्यामा आफैं भिटामिन ‘ए’ अभियान स्थगित गरेको हो । यसले बाँकेका करिब ९० हजार बालबालिका भिटामिन 'ए' खानबाट बञ्चित भएका छन् ।

प्रदेश स्वास्थ्य आपूर्ति केन्द्र बुटवलबाट चैतको ७ गते ह.फा.न. R 490/79/80/0528 मार्फत उपलब्ध गराइएको भिटामिन ‘ए’ (MFG.LIC.NO:10/SC/POF1995, EXP DATE APRIL2023, MFG DATE :MAYA2021BATCH NO: AAE-12-4) क्याप्सुल गरिद गरिएको थियो । त्यही भिटामिन ‘ए’ मन्त्रालयले बाँकेमा पठाएको थियो ।

स्वास्थ्य कार्यालयले आठ वटै स्थानीय तहमा भिटामिन ‘ए’ पठाइसकेको थियो । सम्बन्धित पालिकाले भिटामिन ‘ए’ खुवाउन महिला स्वास्थ्य स्वयंसेविकालाई वितरण समेत गरिसकेका थिए । बाँकेमा ७ सय ८१ महिला स्वास्थ्य स्वयंसेविका छन् । बाँकेमा ८० हजार बढी भिटामिन ‘ए’ क्याप्सुल प्रदेश स्वास्थ्य मन्त्रालयबाट प्राप्त भई पालिकाहरुमा वितरण भएको छ ।

स्वास्थ्य कार्यालय बाँकेले पनि नहेरी वितरण गरेर गम्भीर लापर्वाही गरेको छ । ८० हजार बढी क्याप्सुल वितरण गर्दा पनि एकपटक भिटामिन क्याप्सुलबारे अध्ययन/अनुगमन नगरी वितरण गर्नु ठूलो लापर्वाही हो । क्याप्सुलको प्रयोग मिति समेत निकै कम रहेको स्वास्थ्यकर्मीहरु बताउँछन् । यसमा स्वास्थ्य कार्यालय मुकदर्शक बनेको देखिएको छ ।

प्रदेश स्वास्थ्य निर्देशनालयबाट स्वास्थ्य कार्यालयलाई भिटामिन 'ए' अभियान स्थगित गर्न परिपत्र आएपनि स्वास्थ्य कार्यालयले स्थानीय तहलाई जानकारी नगराएको पाइएको छ । नेपालगञ्ज उपमहानगरपालिकाको स्वास्थ्य महाशाखाले अभियान स्थगित गरिएको सम्बन्धमा सामाजिक सञ्जालबाट जानकारी पाएपनि स्वास्थ्य कार्यालयले कुनै परिपत्र वा मौखिक जानकारी नगराएको बताएको छ । निमित्त प्रमुख जागेश्वर बस्नेतले यसबारे स्वास्थ्य कार्यालयले कुनै जानकारी नगराए पनि प्रदेश स्वास्थ्य निर्देशनालयको परिपत्रका आधारमा भिटामिन 'ए' नखुवाइने बताए ।

No description available.

भिटामिन ‘ए’ को क्याप्सुलको रंग परिवर्तन भएको रिपोर्टिङ स्थानीय तहले गरेकाले तत्काल वितरण नगर्न रोक लगाइएको मन्त्रालयले जनाएको छ । स्वास्थ्य आपूर्ति केन्द्रको गम्भीर लापर्वाहीका कारण बाँकेमा राष्ट्रिय भिटामिन ‘ए’ अभियान प्रभावित भएको हो । ‘समयमै भिटामिन ‘ए’ क्याप्सुल गुणस्तरहीन भएको जानकारी प्राप्त भएकाले एउटा दुर्घटना टर्यो,' एक जना स्वास्थ्यकर्मी भन्छन्–‘गुणस्तरहीन भिटामिन ‘ए’ क्याप्सुल खुवाउँदा बालबालिकाको स्वास्थ्यमा अर्को समस्या पर्न सक्थ्यो । धन्न् जोगियो ।’

बाँकेमा भोलि बुधवार र पर्सि विहीबार राष्ट्रिय भिटामिन ‘ए’ अभियानको तयारी पूरा भइसकेको थियो । स्वास्थ्य कार्यालयले स्वयंसेविकाको हातहातमा पारेको भिटामिन ‘ए’ क्याप्सुल फिर्ता गर्न आन्तरिक सर्कुलर जारी गरेको छ । आपूर्ति केन्द्रको गम्भीर लापर्वाहीले अभियानका लागि गरिएको तयारी विफल भएको छ भने अर्कोतर्फ राज्यलाई अनावश्यक आर्थिक व्ययभार थपिएको छ ।