सिकलसेलका विरामीको राप्तीसोनारीले नि:शुल्क बीमा गरिदिने

स्वास्थ्य

गृहपृष्ठ
स्वास्थ्य
सिकलसेलका विरामीको राप्तीसोनारीले नि:शुल्क बीमा गरिदिने

सिकलसेलका विरामीको राप्तीसोनारीले नि:शुल्क बीमा गरिदिने

बुधबार, जेठ २४, २०८० बागेश्वरी पोस्ट

राप्तीसोनारी (बाँके) । राप्तीसोनारी गाउँपालिकाले सिकलसेल एनिमियाका बिरामीको नि:शुल्क बीमा गर्ने भएको छ । स्वास्थ्य कार्यालय बाँकेले आज राप्तीसोनारी गाउँपालिका-२ कचनापुरमा सिकलसेल एनिमियाका बिरामीहरुको रिपोर्ट सार्वजनिकीकरण कार्यक्रममा गाउँपालिकाका अध्यक्ष तप्त पौडेलले आगामी आर्थिक वर्ष २०८०/८१ देखि पालिकाभित्र रहेका सिकलसेलका बिरामीको पालिकाले नि:शुल्क बीमा गरिदिने बताएका हुन् ।

`सिकलसेल भएका बिरामीले जीवनभरी औषधि खानुपर्ने हुन्छ । निम्न आयस्रोत भएकालाई औषधि किन्न मुस्किल हुन्छ । बीमा गरिदियो भने त्यसले धेरै सहज हुन्छ । अर्को वर्षदेखि सिकलसेलका बिरामीलाई पालिकाले बीमा कार्यक्रममा समेट्छ,' उनले भने-`बीमा बाफतको शुल्क पालिकाले तिर्छ ।´ राप्तीसोनारीका ४ वटा वडामा स्याम्पलिङ गर्दा ११ जना सिकलसेलका बिरामी फेला परेको स्वास्थ्य कार्यालय बाँकेका जनस्वास्थ्य अधिकृत नरेश श्रेष्ठले जानकारी दिए ।

पछिल्लोपटक वडा नम्बर ६ कमैयाडाँडामा ६३१ जनाको नमूना जाँच गर्दा २ जना रोगी र ३६ जना वाहक फेला परेका छन् भने वडा नम्बर २ कचनापुरमा ४८७ जनाको नमूना जाँच गर्दा ३ जना रोगी र ४४ जना वाहक फेला परेका छन् । गत वर्ष वडा नम्बर ३ र ४ मा २ हजार १९५ जनाको नमूना जाँच गर्दा ६ जना रोगी र २९१ जना वाहक फेला परेका थिए । थारु समुदायमा जनस्वास्थ्य समस्याका रुपमा रहेको सिकलसेल एनिमिया र थालेसेमिया रोग नियन्त्रणका लागि स्वास्थ्य कार्यालयले विज्ञहरुलाई बस्तीस्तरमै पुर्‍याएर स्थानीयबासीलाई सचेत बनाउने काम गरिरहेको छ । भेरी अस्पताल नेपालगन्जका प्रमुख कन्सल्टेन्ट फिजिसियन डा. राजन पाण्डे, मनोसामाजिक परामर्शदाता उषा वली सहितको टिमले रोगीहरुलाई परामर्श समेत दिने गरेको छ ।

प्रकाशित मिति: बुधबार, जेठ २४, २०८० १७:२२