स्वास्थ्य बीमा कार्यक्रम लागू गर्न सरकारको ध्यानाकर्षण

स्वास्थ्य

गृहपृष्ठ
स्वास्थ्य
स्वास्थ्य बीमा कार्यक्रम लागू गर्न सरकारको ध्यानाकर्षण

स्वास्थ्य बीमा कार्यक्रम लागू गर्न सरकारको ध्यानाकर्षण

सोमबार, भदौ १८, २०८० बागेश्वरी पोस्ट

नेपालगञ्ज । बाँकेस्थित दुई वटा अस्पतालबाट सरकारले स्वास्थ्य बीमा कार्यक्रम हटाएपछि नागरिक समाजले सरकारलाई ज्ञापनपत्र पठाएको छ । नागरिक समाज तथा सर्बसाधारणको अगुवाईमा स्वास्थ्य मन्त्री र स्वास्थ्य बीमा बोर्डलाई ज्ञापनपत्र पठाइएको हो । सूचना र मानवअधिकार अनुसन्धान केन्द्रका अध्यक्ष विश्वजित तिवारी नेतृत्वको समूहले आज जिल्ला प्रशासन कार्यालय बाँकेका सहायक प्रमुख जिल्ला अधिकारी टोपेन्द्रबहादुर केसीमार्फत सरकारलाई ज्ञापनपत्र बुझाएको हो ।

स्वास्थ्य जस्तो महत्वपूर्ण क्षेत्र भएकाले स्वास्थ्य बीमा कार्यक्रम देशका सम्पूर्ण अस्पतालहरुमा लागू गर्नुको सट्टा केही दिन अघि सरकारले देशका २६ वटा अस्पतालहरुमा सेवा प्रदायक स्वास्थ्य संस्थाको सूचीबाट हटाएकोले उक्त निर्णयलाई सच्याउन आग्रह गरिएको ज्ञापनपत्रमा उल्लेख गरिएको छ । बाँकेस्थित फत्तेबाल आँखा अस्पताल र नेपालगञ्ज मेडिकल कलेजमा स्वास्थ्य बीमा कार्यक्रम लागू गरी उक्त अस्पतालहरुमा हरेक नागरिकको स्वास्थ्य उपचारको पहँुच बृद्धि गरी पुनः सूचीमा समाबेशका लागि सरकारसंग जोडदार माग गरिएको ज्येष्ठ नागरिक अगुवा कृष्णमुरारीप्रसाद भट्टले बताए ।

नेपालको संविधानले आधारभूत स्वास्थ्य सेवालाई निःशुल्क र सामाजिक सुरक्षाको हक प्रदान गरेको छ । वर्तमान संबिधानको धारा ५१ (ज) मा नागरिकका आधारभूत आवश्यकता सम्बन्धि नीति अन्तर्गत नागरिकको स्वास्थ्य बीमा सुनिश्चित गर्दै स्वास्थ्य उपचारमा पहुँचको व्यवस्था मिलाउने उल्लेख छ । गुणस्तरीय स्वास्थ्य सेवा प्राप्त गर्ने नागरिकको अधिकारको संरक्षण गर्न, स्वास्थ्य बीमाद्वारा पूर्व भुक्तानीको माध्यमबाट बीमितको आर्थिक जोखिम न्यूनीकरण गर्न तथा स्वास्थ्य सेवा प्रदायकको दक्षता र जवाफदेहिता अभिवृद्धि गरी स्वास्थ्य सेवामा आमनागरिकको सहज पहुँच सुनिश्चित गर्न स्वास्थ्य बीमा ऐन २०७४ जारी भएको हो । सरकारले बीमा प्रिमियम तिर्ने गरी छुट्टै एकाईको रुपमा बार्षिक रु. १ लाख बराबरको स्वास्थ बीमाको व्यवस्था गरिएको छ । नागरिकको स्वास्थ्य अधिकारलाई प्रत्याभूत गर्नका लागि सबै अस्पतालहरुमा स्वास्थ्य बीमा कार्यक्रम लागू गरी नागरिकको उपचार सेवालाई प्रभावकारी बनाउन जोड दिइएको छ ।

प्रकाशित मिति: सोमबार, भदौ १८, २०८० १७:११