भेरी अस्पताल पुगेर भूकम्पका घाइतेलाई भेटे उपप्रधानमन्त्री खड्काले

स्वास्थ्य

गृहपृष्ठ
स्वास्थ्य
भेरी अस्पताल पुगेर भूकम्पका घाइतेलाई भेटे उपप्रधानमन्त्री खड्काले

भेरी अस्पताल पुगेर भूकम्पका घाइतेलाई भेटे उपप्रधानमन्त्री खड्काले

आइतबार, कात्तिक १९, २०८० बागेश्वरी पोस्ट

नेपालगन्ज । उपप्रधान एवं रक्षा मन्त्री पूर्णबहादुर खड्काले भेरी अस्पतालमा उपचाररत भूकम्पका घाइतेहरुलाई भेटेर स्वास्थ्य अवस्थाबारे जानकारी लिएका छन् । आज अपरान्ह भेरी अस्पताल पुग्नुभएका उपप्रधानमन्त्री खड्काले घाइतेहरूको अवस्था बुझेका हुन् ।

उनले घाइतेहरूको शीघ्र स्वास्थ्य लाभको कामना गर्दै भेरी अस्पताललाई भूकम्पका घाइतेहरूको उपचारमा कुनै कमी हुन नदिन निर्देशन दिए । उनले सरकारले घाइतेहरूको निःशुल्क औषधि गर्ने जानकारी गराउँदै प्रतिकार्य र राहतमा तदारुकताका साथ काम गरिरहेको बताए । उपप्रधानमन्त्री खड्कालाई बाँकेका प्रमुख जिल्ला अधिकारी श्रवणकुमार पोखरेलले बाँकेका अस्पतालहरुमा भूकम्प प्रभावित घाइतेहरुको प्रभावकारी उपचार, उद्दार र राहतका लागि भएका कामहरुको बारेमा जानकारी गराएका थिए ।

भेरी अस्पतालका प्रमुख मेडिकल सुपरिटेन्डेन्ट डा. पवनजंग रायमाझीले अस्पतालमा उपचाररत घाइतेहरुको अवस्थाबारे जानकारी गराएका थिए । सरकारले भूकम्प प्रभावित जिल्लाहरुका घाइतेको उपचारका लागि भेरी अस्पताललाई डेडिकेटेड अस्पताल तोकेको छ । भेरीमा भूकम्पका घाइतेको उपचारका १०५ बेड छुट्ट्याइएको छ । हाल जाजरकोट र रुकुम पश्चिममा ३७ जना घाइतेहरूको भेरीमा उपचार भइरहेको छ । एक जना भने नेपालगन्ज मेडिकल कलेज कोहलपुरमा उपचाररत छन् ।

प्रकाशित मिति: आइतबार, कात्तिक १९, २०८० १८:२३

प्रतिक्रिया दिनुहोस्