श्रीमती र छोराको हत्या आरोपमा दाङमा प्रहरी जवान पक्राउ

सुरक्षा-अपराध

गृहपृष्ठ
सुरक्षा-अपराध
श्रीमती र छोराको हत्या आरोपमा दाङमा प्रहरी जवान पक्राउ

श्रीमती र छोराको हत्या आरोपमा दाङमा प्रहरी जवान पक्राउ

आइतबार, माघ २१, २०८० बागेश्वरी पोस्ट

दाङ । दाङको घोराहीमा नेपाल प्रहरीका जवान आफ्नै श्रीमती र छोराको हत्या गरेको आरोपमा पक्राउ परेका छन् ।

दाङ प्रहरीमा कार्यरत ३२ वर्षीय प्रहरी जवान पिमलाल नेपालीले २२ वर्षीया श्रीमती टीका विक र साढे २ वर्षीय छोरा सुशान्त नेपालीको हत्या गरेको आरोपमा नियन्त्रणमा लिएर अनुसन्धान गरिरहेको जिल्ला प्रहरी कार्यालय दाङले जानकारी दिएको छ ।

दाङ प्रहरीका अनुसार जवान नेपाली नेपालगन्जबाट श्रीमती आएकाले गएराति कार्यालयबाट बिदा लिएर घोराहीस्थित सुपरलज होटलको कोठा नं.१ मा बास बसेका थिए । तर, आज बिहान ७ बजेतिर आपसी विवाद भएपछि सलले घाँटी कसेर श्रीमती र छोराको हत्या गरेको प्रारम्भिक अनुसन्धानबाट खुलेको जिल्ला प्रहरी कार्यालय दाङले जनाएको छ ।

जवान नेपालीले श्रीमती र छोराको हत्या गरेर आफैं प्रहरी कार्यालयमा उपस्थित भएका थिए । रुन्टीगढी गाउँपालिका–९, रोल्पा घर भएका जवान नेपाली लामो समय नेपालगन्जस्थित प्रहरी तालिम केन्द्रमा कार्यरत थिए । नेपालीको दुई महिना अघि मात्रै जिल्ला प्रहरी कार्यालय दाङमा सरुवा भएको थियो । घटनाबारे थप अनुसन्धान भइरहेको दाङ प्रहरीले जानकारी दिएको छ ।

प्रकाशित मिति: आइतबार, माघ २१, २०८० ११:१२

प्रतिक्रिया दिनुहोस्