बढ्दै मिर्गौलाको जोखिम, सावधानी अपनाउन चिकित्सकको सुझाव

स्वास्थ्य

गृहपृष्ठ
स्वास्थ्य
बढ्दै मिर्गौलाको जोखिम, सावधानी अपनाउन चिकित्सकको सुझाव

बढ्दै मिर्गौलाको जोखिम, सावधानी अपनाउन चिकित्सकको सुझाव

शनिबार, फागुन १२, २०८० बागेश्वरी पोस्ट

नेपालगन्ज । पछिल्लो समय मिर्गौलाको जोखिम बढ्दै गएको भन्दै चिकित्सकहरुले सावधानी अपनाउन सुझाव दिएका छन् । फेरिँदो जीवनशैली, खानपिन लगायतका कारणले मिर्गौलामा समस्या हुने क्रम अस्वभाविक रुपमा बढ्दै गएको भन्दै चिकित्सकहरुले समयमै सावधानी अपनाउन सुझाएका हुन् ।

भेरी अस्पताल नेपालगन्जका वरिष्ठ मिर्गौला रोग विशेष डा. सौरभ हमालले नेपालमा अहिले मृत्यु हुने कारण मध्ये मिर्गौला १०औं स्थानमा पर्छ । तर, अबको १० वर्षपछि यो तेस्रो स्थानमा आउन सक्ने भन्दै उहाँले सावधानी अपनाउन सुझाव दिनुभयो ।

लक्ष्मी सरस्वती पोलिक्लिनिक तथा डाइग्नोस्टिक सेन्टरद्वारा आज नेपालगन्जमा आयोजित स्वास्थ्यकर्मीहरुलाई मिर्गौला रोग व्यवस्थापन सम्बन्धि अभिमुखीकरण कार्यक्रममा उनले सुगर तथा प्रेसरका बिरामीहरुमा मिर्गौलाको जोखिम बढी हुने बताए । रगत, पिसाब र अल्ट्रासाउन्ड जाँच गर्ने हो भने धेरै हदसम्म मिर्गौलाको अवस्थाबारे थाहा हुने उनको भनाई छ । डायलाइसिस गराउनै पर्ने स्थितिसम्म पुग्नुपर्ने अवस्था आउन नदिन चेकजाँच नै उपयुुक्त विकल्प भएको पनि उनले बताए । उनले मिर्गौला रोगको पहिचान गर्न जोखिम समुदाय सबैको स्कृनिङ गर्न जरुरी रहेको बताए ।

शरीर सुनिने, शरीर चिलाउने, खाना खान मन नलाग्ने जस्ता लक्षण देखिए मिर्गौलामा समस्या भएको हुन सक्ने अनुमान गर्न सकिन्छ । मिर्गौला रोगीले नुनको मात्रा कम खाने, मदिरा तथा धूम्रपान सेवन नगर्ने, प्रोटिनको मात्रा मिलायर खाने हो भने आयु लम्ब्याउन सकिने पनि उनको भनाई छ ।

वरिष्ठ मिर्गौला रोग विशेषज्ञ डा. हमालले मिर्गौला सुरक्षाका लागि सबै नागरिक सचेत हुन जरुरी रहेको बताए । मिर्गौला सुरक्षाबारे स्वास्थ्यकर्मीहरुलाई पनि विशेषज्ञ चिकित्सकबाट तथ्यपरक जानकारी प्रवाह गर्नका लागि कार्यक्रम गरिएको लक्ष्मी सरस्वती पोलिक्लिनिकले जनाएको छ ।

प्रकाशित मिति: शनिबार, फागुन १२, २०८० ११:३९

प्रतिक्रिया दिनुहोस्