बाँकेमा पहिलो दिन ३४ हजार बढीले दादुरा–रुबेला विरुद्धको खोप लगाए

स्वास्थ्य

गृहपृष्ठ
स्वास्थ्य
बाँकेमा पहिलो दिन ३४ हजार बढीले दादुरा–रुबेला विरुद्धको खोप लगाए

बाँकेमा पहिलो दिन ३४ हजार बढीले दादुरा–रुबेला विरुद्धको खोप लगाए

नेपालगञ्ज उपमहानगरपालिकामा पहिलो दिन ६ हजार ३७५ जनालाई खोप

आइतबार, फागुन १३, २०८० बागेश्वरी पोस्ट

नेपालगञ्ज । बाँकेमा पहिलो दिन आज ३४ हजार बढी बालबालिकाहरुले दादुरा–रुबेला विरुद्धको खोप लगाएका छन् । स्वास्थ्य कार्यालय बाँकेका निमित्त प्रमुख नरेशबाबु श्रेष्ठका अनुसार खोप अभियानको पहिलो दिन ९ महिनादेखि १५ वर्ष उमेर समूहका ३४ हजार २३८ जना बालबालिकाले दादुरा–रुबेला विरुद्धको खोप लगाएका हुन् । पहिलो दिन सबैभन्दा धेरै कोहलपुरका बालबालिकाले खोप लगाएका छन् ।

कोहलपुरमा ८ हजार ७२ जना बालबालिकाले खोप लगाएका छन् । कोहलपुर नगरपालिकामा २५ हजार ७१३ जनालाई खोप लगाउने लक्ष्य रहेको छ । नेपालगञ्ज उपमहानगरपालिकामा ४२ हजार २७० जना मध्ये पहिलो दिन ६ हजार ३७५ जनालाई खोप लगाइएको स्वास्थ्य महाशाखाका जनस्वास्थ्य निरीक्षक तेज वलीले बताए । आज पालिकाका सबै वडाहरुबाट ३१३९ जना महिला र ३२३९ जना पुरुष अर्थात १५ प्रतिशत बालबालिकालाई खोप लगाइएको वलीले जानकारी दिए ।

राप्तीसोनारी गाउँपालिकामा ३ हजार ५८९ जनाले खोप लगाए । त्यहाँ १८ हजार ६६१ जनालाई खोप लगाउने लक्ष्य छ । यसैगरी बैजनाथ गाउँपालिकामा १९ हजार २२३ जना बालबालिकालाई दादुरा–रुबेला खोप लगाउने लक्ष्य लिएकोमा पहिलो दिन २ हजार २१५ जनाले खोप लगाएका छन् । जानकी गाउँपालिकामा १८ हजार १४९ मध्ये १ हजार ९८७ जना, डुडुवा गाउँपालिकामा १३ हजार ७५५ जनामध्ये ४ हजार ३३२ जना र नरैनापुर गाउँपालिकामा १३ हजार ७७६ जनामध्ये आज पहिलो दिन १ हजार ७३५ जना बालबालिकाले खोप लगाएका छन् ।

बाँकेमा कूल १ लाख ६५ हजार ५६६ जना बालबालिकालाई दादुरा–रुबेला खोप लगाउने लक्ष्य रहेको छ । यो अभियान ३० गतेसम्म जारी रहनेछ ।

प्रकाशित मिति: आइतबार, फागुन १३, २०८० २१:३१

प्रतिक्रिया दिनुहोस्