प्रहरीले गरेको दमनविरुद्ध राप्रपाले माग्यो गृहमन्त्रीको राजीनामा

राजनीति

गृहपृष्ठ
राजनीति
प्रहरीले गरेको दमनविरुद्ध राप्रपाले माग्यो गृहमन्त्रीको राजीनामा

प्रहरीले गरेको दमनविरुद्ध राप्रपाले माग्यो गृहमन्त्रीको राजीनामा

मंगलबार, चैत २७, २०८० बागेश्वरी पोस्ट

काठमाडौं । राष्ट्रिय प्रजातन्त्र पार्टी (राप्रपा) ले गृहमन्त्री रवि लामिछानेको राजीनामा मागेको छ । सरकारसँग ४० बुँदे माग राखेर आज बिहान राप्रपाले भृकुटीमण्डपबाट सुरु गरेको जुलुसमाथि प्रहरीले बल प्रयोग गरेपछि झडपको अवस्था आएको राप्रपा अध्यक्ष राजेन्द्र लिङ्देनले बताए ।

अध्यक्ष लिङ्देनले प्रदर्शनपछिको कोणसभामा बोल्दै भने-"गृहमन्त्रीलाई चेतावनी दिएर भन्छु, गृहमन्त्रीका प्रहरीले आज राप्रपामाथि दमन गरेको दिनलाई सम्झनामा राख्नेछौं, आजका दिनदेखि गृहमन्त्रीको राजीनामा माग गर्दै राप्रपाको माग ४० बुँदाबाट ४१ भएको छ ।"

शान्तिपूर्णरुपले आइरहेको जुलुसमाथि प्रहरीले गरेको दमन गलत भएको भन्दै गृहमन्त्रीले आज ठूलो गल्ती गरेको अध्यक्ष लिङ्देनले भने । राप्रपाले आजको भन्दा कडा आन्दोलन गर्ने लिङ्देनले उद्घोष गरे ।

उक्त झडपमा १ दर्जन बढी कार्यकर्ताहरु घाइते भएका छन् भने केहीलाई प्रहरीले पक्राउ गरेको छ ।उक्त प्रदर्शनका क्रममा प्रहरीले प्रदर्शनकारीमाथि पानीको फोहरा, दर्जनौं राउन्ड अश्रुग्यास र लाठीचार्ज प्रहार गरेको थियो ।

प्रकाशित मिति: मंगलबार, चैत २७, २०८० १५:३७

प्रतिक्रिया दिनुहोस्