ठोस फोहोर व्यवस्थापन गर्ने सरसफाईकर्मीको स्वास्थ्य जाँच र पिपिई वितरण

स्वास्थ्य

गृहपृष्ठ
स्वास्थ्य
ठोस फोहोर व्यवस्थापन गर्ने सरसफाईकर्मीको स्वास्थ्य जाँच र पिपिई वितरण

ठोस फोहोर व्यवस्थापन गर्ने सरसफाईकर्मीको स्वास्थ्य जाँच र पिपिई वितरण

बुधबार, जेठ १६, २०८१ बागेश्वरी पोस्ट

नेपालगञ्ज । घरेलु ठोस फोहोर व्यवस्थापन गर्ने सरसफाईकर्मीको निःशुल्क स्वास्थ्य जाँचसंगै व्यक्तिगत सुरक्षा सामग्री (पिपिई) प्रदान गरिएको छ । नेपालगञ्ज उपमहानगरपालिकाभित्र घरेलु ठोस ब्यवस्थापन गर्ने १७० जना सरसफाईकर्मीको निःशुल्क स्वास्थ्य जाँच र पिपिई प्रदान गरिएको हो ।

नेपालगञ्ज उपमहानगरपालिकासंगको सहकार्यमा नेपाल विकास समाजले तीन दिने निःशुल्क स्वास्थ्य शिविर तथा अभिमुखीकरण कार्यक्रम गरेको हो । सहरी स्वास्थ्य प्रबद्र्धन केन्द्र वडा नम्बर ४ का प्रमुख डा. शंकर केसी र भेरी अस्पताल नेपालगञ्जकी मेडिकल अधिकृत डा. समिक्षा चन्दले सरसफाईकर्मीको स्वास्थ्य जाँच गरिरहेका छन् । स्वास्थ्य जाँचका क्रममा सरसफाईकर्मीहरुको एचआइभी, हेपाटाइटिस 'बी', हेपाटाइटिस 'सी', सुगर र पिसाबको प्रयोगशाला परीक्षण समेत गरिएको छ । उनीहरुलाई औषधि समेत वितरण गरिने नेपाल विकास समाजकी निर्देशक गिता शाहले बताइन् ।

सरसफाईकर्मीलाई नेपालगञ्ज उपमहानगरपालिका विपद तथा वातावरण समिति संयोजक समिरप्रताप सिंह र स्वास्थ्य महाशाखा प्रमुख राम बहादुर चन्दले जुत्ता, पञ्जा र रिफ्लेक्टर ज्याकेट वितरण गरेका थिए । सिंहको अध्यक्षता र चन्दको प्रमुख आतिथ्यतामा उद्घाटन कार्यक्रम सम्पन्न भएको थियो । उद्घाटन कार्यक्रममा बोल्दै विपद् समिति संयोजक सिंह, स्वास्थ्य महाशाखा प्रमुख चन्द, वातावरण तथा विपद शाखा प्रमुख प्रकाश डिसी, नेपाल विकास समाजकी निर्देशक शाह, बीग्रुपका समद सिद्दिकीले घरेलु फोहोर व्यवस्थापनका क्षेत्रमा काम गर्ने सरसफाईकर्मीले आफ्नो स्वास्थ्य अवस्थाका बारेमा अझ बढी संवेदनशीलता अपनाउनुपर्ने बताए ।

नेपाल विकास समाजकी निर्देशक शाहले ठोस फोहोर व्यवस्थापनमा काम गर्ने सरसफाईकर्मीको बारेमा सुक्ष्म अनुसन्धानसंगै स्वास्थ्य अवस्थाबारे अध्ययन गर्दै आइरहेको बताइन् । कर्णाली र सुदुरपश्चिम बाहेक पाँच प्रदेशका पाँच प्रमुख सहरहरुमा 'घरेलु फोहोरको उचित व्यवस्थापनमार्फत नेपालमा जनस्वास्थ्य तथा वातावरणीय स्वास्थ्य सुधार परियोजना' सञ्चालन गरेको नेपाल विकास समाजका विपन बहादुर तिवारीले जानकारी दिए ।

प्रकाशित मिति: बुधबार, जेठ १६, २०८१ १३:५८