नेपालगञ्जको पुरैनीमा पाठेघरको मुखको क्यान्सर सम्बन्धि निःशुल्क शिविर

स्वास्थ्य

गृहपृष्ठ
स्वास्थ्य
नेपालगञ्जको पुरैनीमा पाठेघरको मुखको क्यान्सर सम्बन्धि निःशुल्क शिविर

नेपालगञ्जको पुरैनीमा पाठेघरको मुखको क्यान्सर सम्बन्धि निःशुल्क शिविर

शुक्रबार, जेठ २५, २०८१ बागेश्वरी पोस्ट

नेपालगञ्ज । नेपालगञ्ज उपमहानगरपालिकामा पाठेघरको मुखको क्यान्सर सम्बन्धि निःशुल्क स्वास्थ्य शिविर चलिरहेको छ । यसैक्रममा आज वडा नम्बर २२ पुरैनीमा शिविर गरिएको छ । चालू आर्थिक वर्षमा सात वटा वडामा शिविर संचालन गर्ने लक्ष्य छ । वडा नम्बर ६, १२, १५, १७, १८, २२ र २३ मा पाठेघरको मुखको क्यान्सर सम्बन्धि निःशुल्क स्वास्थ्य शिविर संचालन गर्ने कार्यक्रम बमोजिम वडा नम्बर २३ रर २२ मा शिविर सम्पन्न भएको छ । वडा नम्बर २३ मा विहिबार गरिएको शिविरमा १ सय १० जना महिलाको पाठेघरको मुखको स्क्रिनिंग गरिएको छ । ती मध्ये १ जनामा पोजिटिभ देखिएको बताइएको छ ।

कान्ति आरोग्य अस्पताल नेपालगञ्जको आयोजना एवम् नेपालगञ्ज उपमहानगरपालिकाको सहयोगमा शिविर सञ्चालन भइरहेको छ । पुरैनीमा शिविर शुभारम्भका क्रममा सुशील कोइराला क्यान्सर अस्पतालका क्यान्सर रोग विशेषज्ञ डा. इन्द्रनिल घोषले पाठेघरको मुख नियमितरूपमा जाँच गराए क्यान्सरको जोखिमबाट बच्न सकिने बताए । पाठेघरमा घाउ भए नभएको जाँच गरेर स्क्रिनिंग गरिने डा. घोषले बताए । क्यान्सर हुनु भन्दा पहिले घाउ निको बनाउन सके क्यान्सरको जोखिम टर्ने उनको भनाई छ । गर्भवती र महिनावारी भएको बेला जाँच गर्न नमिल्ने जानकारी दिँदै डा. घोषले २४ देखि ६५ वर्षका महिलाले जाँच गराउनुपर्ने बताए । कान्ति आरोग्य अस्पतालकी डा. रोमा बोराले लाज नमानेर जाँच गराउन महिलाहरुलाई आग्रह गरिन् । वडा नम्बर २२ का वडा अध्यक्ष अब्दुल गफ्फार हलवाईले शिविरबाट महिलाहरू लाभान्वित हुने बताए ।

May be an image of 11 people and people smiling

शिविरमा पाठेघरको मुखको क्यान्सर परीक्षण पोजिटिभ देखिएमा सम्बन्धित अस्पतालमा प्रेषण गरिने स्वास्थ्य महाशाखा प्रमुख राम बहादुर चन्दले बताए । नेपाल सरकारले क्यान्सर रोगका विरामीलाई उपचार खर्चका लागि एक लाख रुपैयाँ र लुम्बिनी प्रदेश सरकारले दुई लाख रुपैयाँ दिँदै आएको छ । यस्तै विरामीलाई जिविकोपार्जनमा सहजताका लागि मासिक पाँच हजार रुपैयाँ दिने गरेको छ । स्वास्थ्य महाशाखा प्रमुख चन्दले समयमै रोगको पहिचान, निदान र उपचारमा सहजताका लागि प्रत्येक वर्ष विभिन्न बस्तीहरुमा पाठेघरको मुखको क्यान्सर सम्बन्धि निःशुल्क स्वास्थ्य शिविर गर्दै आएको बताए । शिविरमा भेरी अस्पतालकी मेडिकल अधिकृत डा. समिक्षा चन्दले जाँच गरिरहेको स्वास्थ्य महाशाखाकी सिनियर अनमी निरीक्षक प्रेम कुमारी विसीले जानकारी दिइन् ।

प्रकाशित मिति: शुक्रबार, जेठ २५, २०८१ १९:४६

प्रतिक्रिया दिनुहोस्