भेरी अस्पतालमा ‘सिटीस्क्यान मेसिन’ बिग्रिँदा बिरामी समस्यामा

स्वास्थ्य

गृहपृष्ठ
स्वास्थ्य
भेरी अस्पतालमा ‘सिटीस्क्यान मेसिन’ बिग्रिँदा बिरामी समस्यामा

भेरी अस्पतालमा ‘सिटीस्क्यान मेसिन’ बिग्रिँदा बिरामी समस्यामा

शनिबार, साउन २६, २०८१ बागेश्वरी पोस्ट

नेपालगञ्ज । नेपालगञ्जस्थित भेरी अस्पतालमा ‘सिटिस्क्यान मेसिन’ बिग्रिँदा बिरामी समस्यामा परेका छन् ।

बर्दिया मधुवन नगरपालिका, तारातालका राधेश्याम थारुले भेरी अस्पतालमा सिटिस्क्यान सेवा सञ्चालनमा नआउँदा उपचार गराउन समस्या भएको बताए । “यहाँ राम्रो उपचार होला भनेर बिरामीलाई ल्याइयो, चिकित्सकले सिटीस्क्यान गर्न भने पनि भेरीमा बिग्रिएकोले एक रात कुर्नुपर्‍यो”,उनले भने,“भोलीपल्ट पनि नबनेपछि बिरामीलाई बाहिर सिटीस्क्यान गराउनुपर्‍यो ।” अस्पतालमा लुम्बिनी, कर्णाली र सुदूरपश्चिम प्रदेशबाट पनि सिफारिस भएका बिरामी आउने गर्दछन् ।

सिटीस्क्यान मेसिन बिग्रिएको करीब एक महिना भइसकेको छ । अस्पतालका प्रमुख डा. प्रकाश थापाले सिटीस्क्यान मेसिन नियमितरुपमा सञ्चालनमा ल्याउन प्रयासरत रहेको जानकारी दिए । उनले शुक्रवार भेरी अस्पताल नेपालगञ्जमा आएका स्वास्थ्य तथा जनसङ्ख्या मन्त्रालयका सचिव डा. रोशन पोखरेलसँग सिटीस्क्यानको समस्या देखाउँदै नयाँ सिटीस्क्यानको माग समेत गरेका थिए ।

उनले पोखरेलले तत्काल नयाँ मेसिन खरिदको सम्भावना नभएकोले पुरानै मेसिन मर्मत गरी सेवा प्रवाह गर्न निर्देशन दिँदै दोस्रो चौमासिकसम्म नयाँ मेसिन खरिदको प्रक्रिया अघि बढाउने जानकारी दिए । भेरी अस्पतालको स्तरोन्नति गर्दै सरकारले भौतिक पूर्वाधार विकास, विशेषज्ञ उपचार सेवा, दक्ष जनशक्ति, अत्याधुनिक उपकरण सेवा सुविधामा थप्दै गएको छ । रासस

प्रकाशित मिति: शनिबार, साउन २६, २०८१ १८:५३