'नरैनापुरमा झाडापखालाको प्रकोप छैन'

स्वास्थ्य

गृहपृष्ठ
स्वास्थ्य
'नरैनापुरमा झाडापखालाको प्रकोप छैन'

'नरैनापुरमा झाडापखालाको प्रकोप छैन'

फोहोर पानीको संक्रमण र खानपिन नमिल्दा समस्या देखिएको प्रारम्भिक अनुमान

सोमबार, भदौ १७, २०८१ बागेश्वरी पोस्ट

नेपालगञ्ज । बाँकेको नरैनापुरमा झाडापखलाको प्रकोप नफैलिएको स्वास्थ्यकर्मीले बताएका छन् । नरैनापुर गाउँपालिका–३ गेग्ली गाउँमा झाडापखलाको प्रकोपबाट ४ जनाको मृत्यु भएको घटना सार्वजनिक भएपछि जिल्लाबाट स्वास्थ्य कार्यालय बाँकेका प्रमुख अंगद बहादुर शाही, जनस्वास्थ्य अधिकृत नरेश श्रेष्ठ सहितको स्वास्थ्यकर्मीको टोली आज गेग्ली गाउँमा पुगेको थियो ।

झाडापखालाको प्रकोप नै फैलिएको अवस्था नरहेको टोलीले निष्कर्ष निकालेको छ । मृत्यु पनि झाडापखालाबाटै हो वा होइन त्यसको अनुसन्धान पनि भइरहेको स्वास्थ्य कार्यालय बाँकेले जनाएको छ । एक जना बालकको भने उच्च ज्वरो र जोर्नी दुख्ने लगायतका कारणबाट मृत्यु भएको पाइएको छ । उनलाई डेंगुको आशंका गरिएको छ ।

चार-पाँच दिनको फरकमा नरैनापुर गाउँपालिका–३ मा एउटै घरका ३ जना र अन्य एक जनासहित ४ जनाको मृत्यु भएको थियो । मृत्यु हुनेमा २६ वर्षीय उषा पासी, १२ महिनाकी नन्दनी पासी र ६५ वर्षीया कान्ति पासी रहेका छन् । यस्तै १० वर्षीय युसुफ अलि शेषको पनि मृत्यु भएको थियो ।

उषालाई भदौ ११ गते वान्ता र झाडापखाला भएको थियो । त्यसपछि उपचारका लागि नरैनापुरको निजी मेडिकलमा लगिएको थियो । उषाको १२ गते मृत्यु भएको स्वास्थ्य कार्यालय बाँकेका अधिकृत श्रेष्ठले बताए । पासीकी छोरी नन्दनीलाई १४ गते वान्ता र झाडापखालाको लक्षण चिन्ह देखिएको थियो । उनलाई उपचारका लागि भारतको श्रावस्ती लैजाने क्रममा १६ गते मृत्यु भएको परिवारले जानकारी दिएको पनि श्रेष्ठले बताए । काम्तीलाई १३ गते वान्ता र झाडापखालाको लक्षण चिन्ह देखिएको थियो । उनको स्थानीय निजी मेडिकलमा उपचार गरिएको थियो । काम्तीको १४ गते घरमै मृत्यु भएको थियो ।

युसुफलाई भने उच्च ज्वरो, जोर्नी दुख्ने, तल्लो खुट्टा नचल्ने लगायतका लक्षण चिन्ह थिए । उक्त लक्षण चिन्ह युसुफलाई ९ गते देखिएको थियो । उपचारका लागि भारतको श्रावस्ती लैजाने क्रममा १२ गते मृत्यु भएको हो । युसुफको मृत्यु झाडापखालाबाट नभएको स्वास्थ्यकर्मीहरुले पुष्टि गरेका छन् । लक्षण चिन्हका आधारमा उनको मृत्यु डेंगुबाट भएको आंशका गरिएको छ । ६ जना बिरामीहरु भने उपचारपछि घर फर्किसकेका छन् ।

"मृत्यु भएकाहरुको झाडापखालाको प्रकोपकै कारण हो भन्न सक्ने अवस्था छैन," श्रेष्ठले भने-"फोहोर पानीको संक्रमण र खानपिन नमिल्दा समस्या देखिएको प्रारम्भिक अनुमान गरेका छौं । तर, त्यसको अनुसन्धान भइरहेको छ ।" झाडापखालाको पुष्टि गर्न स्याम्पल कलेक्शन गरेर लक्षणपुर स्वास्थ्य चौकीमा पठाइएको छ । त्यसैगरी पानीको परीक्षण गर्न पनि खानेपानी कार्यालय नेपालगञ्जमा नमुना संकलन गरी पठाइएको छ । "सम्भवतः भोलि (मंगलवार) रिपोर्ट आउनेछ," उनले भने-"नल्काको पानी अत्यन्तै प्रदूषित पाइएको र उनीहरुले त्यही पानी पिउने गरेका छन् ।"

प्रकाशित मिति: सोमबार, भदौ १७, २०८१ २०:३७

प्रतिक्रिया दिनुहोस्