भेरी अस्पतालका नयाँ मेसु डा. निराजनलाई गरियो स्वागत

स्वास्थ्य

गृहपृष्ठ
स्वास्थ्य
भेरी अस्पतालका नयाँ मेसु डा. निराजनलाई गरियो स्वागत

भेरी अस्पतालका नयाँ मेसु डा. निराजनलाई गरियो स्वागत

'भेरीलाई शैक्षिक एकेडेमीका रुपमा विकास गर्न आवश्यक'

बुधबार, असोज ९, २०८१ बागेश्वरी पोस्ट

नेपालगञ्ज । भेरी अस्पतालका नवनियुक्त प्रमुख मेडिकल सुपरिटेन्डेन्ट (मेसु) डा. निराजन सुवेदीलाई अस्पतालमा स्वागत गरिएको छ । आज एक औपचारिक कार्यक्रम गरी डा. सुवेदीलाई स्वागत गरिएको हो । त्यसक्रममा बोल्दै उनले भेरीलाई शैक्षिक एकेडेमीका रुपमा विकास गर्न आवश्यक रहेको बताए ।

डा. सुवेदीले पश्चिम नेपालको प्रेषण अस्पताल भेरीलाई शैक्षिक एकेडेमीका रुपमा विकास गर्न आवश्यक रहेको उल्लेख गरे । त्यसका लागि तत्काल एमडी, एमसीएच (पिजी) अध्ययनका लागि पहल गरिने उनको भनाई छ । ‘बिरामीको उपचार सेवालाई गुणस्तरीय र सहज बनाउने पाटो त छँदैछ,' डा. सुवेदीले भने–‘भेरीमा अब पिजी अध्ययनका लागि पनि पहल हुन्छ ।’ उनले नेपाल सरकारले दिएको जिम्मेवारीलाई कुशलतापूर्वक निर्वाह गर्ने प्रतिवद्धता समेत जनाए । ‘भेरीमा कार्यरत रहँदासम्म मैले आफ्नो काम, कर्तव्य र जिम्मेवारी पूरा गर्नेछु’ उनले भने । अस्पताल सबै कर्मचारीको घर जस्तै भएकोे भन्दै सेवा गर्दासम्म सबै परिवारको सदस्य भएर काम गर्नुपर्नेमा उनले जोड दिए ।

अस्पताल विकास समितिका अध्यक्ष बीरेन्द्र बहादुर शाहले नवनियुक्त मेसु डा. सुवेदीलाई प्राप्त जिम्मेवारीलाई कुशलतापूर्वक निर्वाह गर्न सुझाव दिए । निमित्त मेसु डा. प्रकाश बहादुर थापाले अस्पतालको समग्र विकासका लागि भूमिका निर्वाह गर्न सुझाव दिए । सबैको सहकार्य र समन्वयबाटै अस्पतालको विकास सम्भव हुने र बिरामीले स्तरीय सेवा पाउने भएकाले त्यही अनुसारको भूमिका निर्वाह गर्न उनले सुझाए ।

अस्पताल विकास समितिका सदस्य किरण आचार्यले स्वागत मन्तव्य ब्यक्त गर्ेको कार्यक्रममा अस्पताल विकास समितिका पदाधिकारी, पूर्व मेसुहरु, अस्पतालका विभागीय प्रमुख, नर्सिङ प्रशासक, कर्मचारी लगायतको उपस्थिति रहेको थियो ।

प्रकाशित मिति: बुधबार, असोज ९, २०८१ १५:२३

प्रतिक्रिया दिनुहोस्