नेपालगञ्जमा मनाइयो मुटु दिवस

स्वास्थ्य

गृहपृष्ठ
स्वास्थ्य
नेपालगञ्जमा मनाइयो मुटु दिवस

नेपालगञ्जमा मनाइयो मुटु दिवस

आइतबार, असोज १३, २०८१ बागेश्वरी पोस्ट

नेपालगञ्ज । नेपालगञ्जमा आज विश्व मुटु दिवस मनाइएको छ । दिवसका अवसरमा विभिन्न सचेतनामूलक प्ले-कार्डसहित र्‍याली निकालिएको छ । ग्लेनमार्क कम्पनीको सहकार्यमा नेपाल चिकित्सक संघ भेरी शाखा नेपालगञ्जले आयोजना गरेको कार्यक्रमका सहभागीहरुले संघको कार्यालयबाट गणेशमान चोकसम्म विभिन्न जनचेतनामूलक सन्देशसहितका प्ले-कार्डका साथ र्‍याली निकालेका थिए । यस्तै दिवसकै अवसरमा नेपालगञ्ज मेडिकल कलेजले पनि र्‍याली निकालेको थियो । र्‍यालीपछि आयोजित कार्यक्रममा बोल्ने बक्ताहरुले मानिसले स्वस्थ खानपिन गर्ने, व्यायाम गर्ने र आफ्नो जीवनशैलीमा ध्यान दिएमा मुटु रोगबाट बच्न सकिने बताएका छन् । वक्ताहरुले स्वस्थ जीवनशैली अपनाउने हो भने मुटुसम्बन्धि समस्याबाट बच्न सकिने बताएका हुन् ।

कार्यक्रममा भेरी अस्पतालका प्रमुख कन्सल्टेन्ट कार्डियोलोजिष्ट डा. कृष्ण अधिकारीले खासगरी उच्च रक्तचाप, मधुमेह लगायतका समस्यालाई नियन्त्रणमा राख्न सके मुटु रोगबाट निम्तने खतरा टर्न सक्ने बताए । भेरी अस्पतालका प्रमुख कन्सल्टेन्ट फिजिसियन डा. राजन पाण्डेले मुटु रोगी भई उपचारका लागि अस्पतालसम्म पुग्नु भन्दा सचेत भई रोग लाग्नै नदिन स्वस्थ जीवनशैली अपनाउन आग्रह गरे । भेरी अस्पताल नेपालगञ्जका वरिष्ठ मुटुरोग विशेषज्ञ डा. विकास नेपालले विश्वमा हरेक वर्ष दुई करोड मानिसको मृत्यु मुटु रोगकै कारण हुने गरेको र करोडौं मानिस यसबाट पीडित भरहेको भन्दै यसको हानीबाट बच्न स्वस्थ जीवनशैली अपनाउनुको विकल्प नभएको बताए ।

भेरी अस्पतालका सूचना अधिकारी डा. संकेत रिसालले जनमानसमा जनचेतना जगाई मुटु रोगबाट निम्तिने खतरा टार्न यस खालका कार्यक्रमलाई व्यापकता दिन आग्रह गरे। संघका अध्यक्ष डा. बिनोद थापाको अध्यक्षतामा सम्पन्न कार्यक्रममा विभिन्न अस्पतालमा कार्यरत चिकित्सकहरु, औषधि कम्पनीका बजार प्रतिनिधि, पत्रकार लगायतको उपस्थिति थियो ।

हरेक वर्ष सेप्टेम्बर २९ तारिखका दिन विश्वभर नै विविध सचेतनामूलक कार्यक्रमको आयोजना गरी विश्व मुटु दिवस मनाउने गरिन्छ । यो वर्ष 'युज हर्ट फर एक्सन' भन्ने नाराका साथ दिवस मनाइँदैछ ।

प्रकाशित मिति: आइतबार, असोज १३, २०८१ १६:०१