डेंगी रोकथाम र नियन्त्रणका लागि सरोकारवालासंग अन्तरक्रिया

स्वास्थ्य

गृहपृष्ठ
स्वास्थ्य
डेंगी रोकथाम र नियन्त्रणका लागि सरोकारवालासंग अन्तरक्रिया

डेंगी रोकथाम र नियन्त्रणका लागि सरोकारवालासंग अन्तरक्रिया

नेपालगञ्ज उपमहानगरपालिकामा १९५ जना संक्रमित

सोमबार, कात्तिक १२, २०८१ बागेश्वरी पोस्ट

नेपालगञ्ज । बाँकेमा डेंगीको संक्रमण बढ्दै गएको छ । चालू आर्थिक वर्ष २०८१–०८२ को साउनदेखि असोज मसान्तसम्म ३४८ जना डेंगीबाट संक्रमित भएका स्वास्थ्य कार्यालय बाँकेका किटजन्य रोग फोकल पर्सन दुर्गा गौतमले जानकारी दिइन् । यो भेरी अस्पताल, निजी मेडिकल कलेज र स्वास्थ्य संस्थामा ल्याव परीक्षणबाट पुष्टि भएको संख्या हो । आर्थिक वर्ष २०८०–०८१ मा ३९४ जना डेंगी संक्रमित फेला परेका थिए । यो वर्षमा तीन महिनामै ३४८ जनामा संक्रमण देखिएकाले बाँकेमा डेंगीको अवस्था भयावह देखिएको उनले जानकारी दिइन् ।

अघिल्लो आर्थिक वर्ष २०७९–०८० मा १४९ जनामा मात्रै डेंगीको संक्रमण देखिएको थियो । लामखुट्टेको टोकाईबाट सर्ने डेंगीको संक्रमण गत वर्ष भन्दा यो वर्ष देशभरी घटेको तथ्यांकले देखाए पनि बाँकेमा भने अस्वभाविक ढंगले बढेको गौतमले जानकारी दिइन् । किटजन्य रोग फोकल पर्सन गौतमका अनुसार स्थानीय लामखुट्टेले टोकेर डेंगी संक्रमण समुदायस्तरमै फैलिएकाले बाँकेमा अवस्था भयावह बनेको हो । गएका वर्षहरुमा मानिसहरु वाहिर जिल्ला गएका बेला लामखुट्टेले टोक्ने र डेंगी संक्रमण लिएर बाँके आउने गरेका थिए । उनीहरु बाँकेकै भए पनि वाहिर जिल्लामा गएका बेला लामखुट्टेले टोक्दा डेंगी संक्रमण हुने गरेको थियो । तर, यो पटक भने स्थानीय लामखट्टेले नै टोकेर संक्रमण फैलिएकाले देशभर संक्रमणदर घटे पनि बाँकेमा भने बढ्दै गएको हो ।

संक्रमित ३४८ जनामध्ये १९५ जना नेपालगञ्ज उपमहानगरपालिकाका हुन् । अरु भने अन्य पालिकाका संक्रमित रहेको गौतमले बताइन् । उनले पालिकामा भएका संक्रमितहरुको तथ्यांक पुष्टि गर्ने काम भइरहेको पनि बताइन् । उनले अहिलेसम्म ६२ जना उपचारमा आएको पनि बताए । तीमध्ये नेपालगञ्जका २९, कोहलपुरका १४, खजुराका ८, राप्तीसोनारीका ६, बैजनाथका ५, जानकीका ३ र डुडुवा र नरैनापुरका २–२ जना रहेका छन् ।

May be an image of 12 people and people studying

डेंगीबाट सबैभन्दा बढी प्रभावित नेपालगञ्ज उपमहानगरपालिकाले यसको रोकथाम र नियन्त्रणका लागि सम्वद्ध सरोकारवालासँग आज अन्तरक्रिया कार्यक्रम गरेको स्वास्थ्य महाशाखा प्रमुख रामबहादुर चन्दले जानकारी दिए । डेंगी रोग नियन्त्रणका लागि स्वास्थ्य मन्त्रालयबाट प्राप्त निर्देशन अनुसार खोज र नष्ट गर अभियानलाई प्रभावकारी गराउने उद्देश्यका साथ अन्तरक्रिया गरिएको उनले बताए । चन्दका अनुसार डेंगी नियन्त्रणका लागि सरोकारवालासंग समन्वय तथा अन्तरक्रिया कार्यक्रम सञ्चालन गर्ने, वडास्तरमा लामखुट्टेको बासस्थान खोजी गरी लार्भा र प्युपाहरु नष्ट गर्ने, विद्यालय तहमा शिक्षक तथा विद्यार्थीहरुलाई स्वास्थ्य शिक्षा कार्यक्रम सञ्चालन गर्ने, बायोपेष्टिसाइडको प्रयोग गरी लामखुट्टेका लार्भाहरु नष्ट गर्ने, वडास्तरमा रहेका स्वास्थ्यकर्मीलाई अभिमुखीकरण कार्यक्रम सञ्चालन गर्ने, निजी तथा सरकारी स्वास्थ्य संस्थाहरुमा किटजन्य रोगहरुको डाटा भेरिफिकेशन गर्ने लगायतका कार्यक्रम सञ्चालन भइहरेका छन् ।

May be an image of 13 people, people studying and table

कार्यक्रममा नेपालगञ्ज उपमहानगरपालिकाका नगर प्रमुख प्रशान्त विष्ट, बाँकेका प्रमुख जिल्ला अधिकारी खगेन्द्र प्रसाद रिजाल, प्रमुख प्रशासकीय अधिकृत ओमबहादुर खड्का लगायतले डेंगी रोग नियन्त्रणका लागि समुदायस्तरमा सचेतना फैलाउन आवश्यक रहेको बताए । उनीहरुले डेंगी रोगको नियन्त्रणका लागि लामखुट्टेको बासस्थान खोजी गरी लार्भा र प्यूपा नष्ट गर्ने अभियानलाई प्रभावकारी बनाइनुपर्ने बताए । कार्यक्रममा जनप्रतिनिधि, स्वास्थ्यकर्मी, संचारकर्मी लगायतको सहभागिता रहेको थियो । कार्यक्रमको सहजीकरण स्वास्थ्य महाशाखाका जनस्वास्थ्य निरीक्षक सरोज रिमालले गरेका थिए ।

May be an image of 14 people and people studying