शिक्षा सम्बद्ध रिटमा नरैनापुर गाउँपालिकाको पक्षमा फैसला

स्वास्थ्य

गृहपृष्ठ
स्वास्थ्य
शिक्षा सम्बद्ध रिटमा नरैनापुर गाउँपालिकाको पक्षमा फैसला

शिक्षा सम्बद्ध रिटमा नरैनापुर गाउँपालिकाको पक्षमा फैसला

बुधबार, फागुन २१, २०७६ बागेश्वरी पोस्ट

नरैनापुर(बाँके) । शिक्षा सम्बद्ध रिटमा अदालतले नरैनापुर गाउँपालिकाको पक्षमा फैसला सुनाएको छ ।

गाउँपालिकाले बनाएको शिक्षा ऐन र नियमावली अनुसार शिक्षा समितिले गरेको निर्णय बमोजिम गठन गरिएको विद्यालय व्यवस्थापन समिति खारेज गर्न माग गर्दै परेको रिट उच्च अदालत तुलसीपुर नेपालगञ्ज इजलाशले खारेज गरेको हो । गाउँपालिकाको ऐन नियमावलीलाई सदर गर्दै अदालतले फैसला सनाएको हो ।

न्यायाधिशद्वय राजेश कुमार काफ्ले र पवन कुमार शर्माको इजलाशले नरैनापुर गाउँपालिकाको वडा नम्बर ६ जमुनीस्थित नेपाल राष्ट्रिय आधारभूत विद्यालयको व्यवस्थापन समितिको गठन गाउँपालिकाको ऐन र नियमावली अनुसार नै भएकाले त्यसका विरुद्ध परेको रिट खारेज गर्ने फैसला सुनाएको हो ।

२०७६ मंसिर २३ गते गाउँपालिकाको शिक्षा समितिले पालिकाले बनाएको शिक्षा ऐन र नियमावली २०७४ अनुसार विद्यालय व्यवस्थापन समिति गठन गरेपछि उक्त कार्य संघीय शिक्षा ऐनसंग बाझिने भन्दै खारेजीको माग गर्दै परेको रिटका विपक्षमा अधिबक्तात्रय सुनिल कुमार श्रेष्ठ, लोकबहादर शाह र बलबहादुर चन्दले बहस गर्नुभएको गाउँपालिकाका शिक्षा, युवा तथा खेलकुद शाखा प्रमुख लक्ष्मीकान्त मिश्राले बताउनुभयो । स्थानीय नसिब अलि साई, मेख बहादुर खड्का, नजिर खाँ र बलियासर यादवले उच्च अदालत नेपालगञ्ज इजलाशमा रिट दायर गर्नुभएको थियो ।

गाउँपालिकाका अध्यक्ष इस्तियाक अहमद शाहले गाउँपालिकाले बनाएको शिक्षा ऐन र नियमावलीलाई सदर गर्दै अदालतले गरेको फैसला स्वागतयोग्य भएको बताउँदै शैक्षिक विकास र सुधारका लागि स्थानीय तहले चाल्ने कदम कानुन सम्मत हुने सन्देश यो फैसलाले दिएको प्रतिक्रिया दिनुभयो । यो फैसलालाई नरैनापुरका स्थानीयले पनि स्वागत गरेको वडा नम्बर २ का वडा अध्यक्ष मसुद अहमद शाहले बताउनुभयो ।

प्रकाशित मिति: बुधबार, फागुन २१, २०७६ १८:५७