नेपालगन्ज मेडिकल कलेजको ओपिडी सेवा पूर्णरुपमा बन्द

स्वास्थ्य

गृहपृष्ठ
स्वास्थ्य
नेपालगन्ज मेडिकल कलेजको ओपिडी सेवा पूर्णरुपमा बन्द

नेपालगन्ज मेडिकल कलेजको ओपिडी सेवा पूर्णरुपमा बन्द

शुक्रबार, पुस ५, २०८१ बागेश्वरी पोस्ट

नेपालगन्ज । तलब वृद्धिको माग गर्दै आन्दोलनमा उत्रिएका नेपालगन्ज मेडिकल कलेजका कर्मचारीहरुले आजदेखि ओपिडी सेवा पूर्णरुपमा बन्द गरेका छन् । लर्ड बुद्ध एजुकेसनल एकेडेमीद्वारा सञ्चालित नेपालगन्ज मेडिकल कलेजका कर्मचारीहरुले पहिलो चरणको आन्दोलन पूरा गर्दा समेत माग सम्बोधन नभएको भन्दै यसअघि नै दोस्रो चरणको आन्दोलनका कार्यक्रम घोषणा गरेका थिए । आफ्ना मागको अस्पताल प्रशासनले बेवास्ता गरेको भन्दै उनीहरू आक्रोशित भएका छन् ।

पुस ३ र ४ गते दिउँसो १ बजेदेखि आधा दिन ओपीडी र शैक्षिक कार्यक्रमहरू आंशिक बन्द गरिएकोमा आजदेखि इमर्जेन्सी बाहेक ओपिडी र शैक्षिक कार्यक्रम पूर्णरूपमा बन्द गरिएको आन्दोलन परिचालन कमिटीकी संयोजक एवम् कर्मचारी संगठन सभापति रत्नाकुमारी गिरीले जानकारी दिइन् । सबै प्रशासनिक कार्यालयहरुमा पनि तालाबन्दी गरिएको छ । कर्मचारीहरूले गत असार ४ गते कर्मचारीको तलब, सेवा, सुविधा तथा अस्पतालको संस्थागत सुधारका लागि अस्पताल प्रशासनसमक्ष विभिन्न सात बुँदे मागपत्र राखेका थिए । आज कोहलपुरमा पत्रकार सम्मेलन गरेर आफ्ना माग र थप आन्दोलनका कार्यक्रमबारे जानकारी गराइएको छ । पत्रकार सम्मेलनमा आन्दोलन परिचालन कमिटी सह-संयोजक एवम् कर्मचारी संघ सभापति यम बहादुर खड्का, आन्दोलन परिचालन कमिटी सह-संयोजक एवम् स्वास्थ्यकर्मी युनियन सभापति अनिता थापा लगायतको उपस्थिति थियो । त्यस अवसरमा नेपाल पत्रकार महासंघमा नवनिर्वाचित पदाधिकारी, सदस्य एवम् पार्षदलाई टीका र खादा लगाएर बधाई ज्ञापन समेत गरिएको थियो ।

May be an image of 3 people and text

कर्मचारीले उठाएका उक्त मागहरु पूरा गर्ने सवालमा अस्पताल प्रशासन सराकात्मक नदेखिएपछि मङ्सिर २६ गतेबाट कर्मचारीहरु चरणबद्ध आन्दोलनमा उत्रिएका हुन् । मेडिकल कलेजका कर्मचारी आन्दोलित हुँदा अस्पतालको सेवा प्रवाहमा असर परेको छ । आन्दोलनरत कर्मचारीले आन्दोलनका बेलामा इमर्जेन्सी सेवा भने सुचारु रहने स्पष्ट पारेका छन् ।

नेपालगन्ज मेडिकल कलेजका तर्फबाट वार्ता टोलीका संयोजक श्यामकुमार शर्माले संस्था घाटामा चहिरहेकाले अहिले नै कर्मचारीको तलब वृद्धि गर्ने माग पूरा गर्न सकिने अवस्था नरहेको बताए । हाल नेपालगन्ज मेडिकल कलेजमा स्थायी, अस्थायी र करार गरेर करिब ११ सय कर्मचारी कार्यरत छन् ।

प्रकाशित मिति: शुक्रबार, पुस ५, २०८१ १७:१९