होलियामा शिविर, २ सय ८८ जनाको स्वास्थ्य परीक्षण

स्वास्थ्य

गृहपृष्ठ
स्वास्थ्य
होलियामा शिविर, २ सय ८८ जनाको स्वास्थ्य परीक्षण

होलियामा शिविर, २ सय ८८ जनाको स्वास्थ्य परीक्षण

आइतबार, पुस ७, २०८१ बागेश्वरी पोस्ट

डुडुवा (बाँके) । डुडुवा गाउँपालिका वडा नम्बर १ होलिया गाउँमा सञ्चालित निःशुल्क स्वास्थ्य परीक्षण शिविरमा २ सय ८८ जनाले सेवा लिएका छन् । डुडुवा गाउँपालिकाको सहयोगमा सशस्त्र प्रहरी बल नेपाल नम्बर ३० गण हेडक्वाटर बागेश्वरी बाँकेद्वारा शनिबार सञ्चालित निःशुल्क स्वास्थ्य शिविरमा १ सय ५२ महिला र १ सय ३६ जना पुरुष गरी २ सय ८८ जनाको स्वास्थ्य परीक्षण गरेर औषधि वितरण गरिएको थियो ।

‘सीमावासीसँग सशस्त्र प्रहरी कार्यक्रम’ अन्तर्गत आयोजित शिविरमा निःशुल्क उपचार गर्नुका साथै उनीहरुलाई विभिन्न प्रकारका औषधि निःशुल्क वितरण गरिएको सशस्त्र प्रहरी बल नेपाल नम्बर ३० गण हेडक्वाटर बागेश्वरी बाँकेका प्रमुख सशस्त्र प्रहरी उपरीक्षक बिमल डाँगीले बताए ।

दुरदराजका स्थानीयमा स्वास्थ्य सम्बन्धि विभिन्न समस्याको पहिचान तथा रोगका बारेमा जानकारीका लागि स्वास्थ्य शिविरले ठूलो मद्दत पुर्याएको गाउँपालिका अध्यक्ष नरेन्द्रकुमार चौधरीले बताए । पालिकाले स्वास्थ्य क्षेत्रमा ठूलो लगानी गरेकाले स्वास्थ्य समस्याबाट कुनै पनि नागरिक बञ्चित नहुन् भनेर घरघरमा स्वास्थ्य सेवा लागू गरेको भन्दै चौधरीले स्वास्थ्यलाई पहिलो प्राथमिकतामा राखी आफ्नो स्वास्थ्य चेकजाँच गराउन स्थानीयलाई आग्रह गरे ।

शिविरमा मध्यपश्चिम क्षेत्रीय सशस्त्र प्रहरी बल अस्पताल बाँकेका चिकित्सक सशस्त्र प्रहरी निरीक्षक डा. विवेक पुन, हेल्थ असिस्टेन्ट सशस्त्र प्रहरी नायब निरीक्षक भरत थापा र डिल्लीबहादुर गिरी तथा डुडुवा गाउँपालिकाका जनस्वास्थ्य निरीक्षक रिजवान खान, हेल्थ असिस्टेन्ट पवन कैराती, शैलेन्द्र शर्मा, सिनियर अहेब प्रदिप शाह, अहेब मनोज कैराती र प्रदीप ओलीले बिरामीको चेकजाँच गरेका थिए ।

शिविरमा साधारण स्वास्थ्य परीक्षण, नाक कान घाँटी, दाँत, आँखा तथा अन्य रोगहरुको परीक्षण गरिएको गाउँपालिका स्वास्थ्य शाखाका पवन कैरातीले बताए । डुडुवाको सबैभन्दा बिकट क्षेत्र कृषिचौफेरी, पाझाहोलिया, खडैंचा, पिप्रहवा लगायत गाउँका स्थानीयलाई लक्षित गरी शिविर संचालन गरिएको थियो ।

प्रकाशित मिति: आइतबार, पुस ७, २०८१ १९:१६