डुडुवामा बृहत रक्तदानः २११ पिन्ट रगत संकलन

स्वास्थ्य

गृहपृष्ठ
स्वास्थ्य
डुडुवामा बृहत रक्तदानः २११ पिन्ट रगत संकलन

डुडुवामा बृहत रक्तदानः २११ पिन्ट रगत संकलन

आइतबार, पुस २१, २०८१ बागेश्वरी पोस्ट

नेपालगञ्ज । बाँकेको डुडुवा गाउँपालिकाले रक्तदान महादान अभियान अन्तर्गत आज बृहतरुपमा रक्तदान कार्यक्रम गरेको छ । मानवको जीवन रक्षा तथा सामाजिक उत्तरदायित्वको भावनाका लागि यो अभियानलाई निरन्तरता दिएको गाउँपालिका अध्यक्ष नरेन्द्रकुमार चौधरीले बताए । अध्यक्ष चौधरीले भने–‘मधेशी समुदायमा रगत दिनुपर्ने सचेतना अभिबृद्धिका लागि पनि रक्तदान अभियान शुरु गरिएको हो ।’ गाउँ बस्तीमा रक्तदान गर्ने जागरुकता अभिबृद्धिका लागि यो अभियान शुरु गरिएको उनले बताए ।

बृहत रक्तदान कार्यक्रममा रगत दिनेहरुको ठूलो उत्साह देखिएको थियो । विहान ११ बजेदेखि शुरु भएको रक्तदान कार्यक्रम साँझ ४ बजेसम्म चलेको थियो । कार्यक्रममा गाउँपालिकाका कर्मचारी, शिक्षक, विद्यार्थी, स्वास्थ्यकर्मी, सुरक्षाकर्मी, युवा, महिला लगायत सर्बसाधारण गरी २ सय ११ जनाले रक्तदान गरेको नेपाल रेडक्रस सोसाइटी प्रादेशिक रक्तसञ्चार केन्द्र नेपालगञ्जका प्रमुख उपेन्द्र रेग्मीले बताए । उनका अनुसार बाँकेमा सम्भवतः पहिलो स्थानीय तहको रुपमा डुडुवाले उल्लेख्य रुपमा धेरै संख्यामा रक्तदातालाई जागरुक बनाई रक्तदानतर्फ उत्प्रेरित गरेको छ ।

गाउँपालिकाभित्र गरीब तथा असहाय लगायतका विरामीहरुलाई रगतको व्यवस्थापनका लागि अब गाउँपालिकाले नियमित रुपमा बर्षमा दुई–तीन पटक बृहत रक्तदान कार्यक्रम गरी रगत संकलन गर्ने अध्यक्ष चौधरीले बताए । रक्तदान कार्यक्रममा शतक रक्तदाता १५६औं पटक रक्तदान गरेका गोपीनाथ बैश्य र अर्का शतक रक्तदाता १०२औं पटक रक्तदान गरेका सञ्चारकर्मी पवन जायसवाल र बाँके बर्दियामा उत्कृष्ट महिला रक्तदाता ७६औं पटक रक्तदान गरेकी सरिता ज्ञवालीलाई पालिकाले उत्कृष्ट रक्तदाताको रुपमा सम्मान पत्र र दोसल्लाले विशेष सम्मान गरेको थियो । त्यस अवसरमा २० पटक भन्दा बढी रक्तदान गर्ने करीब ३० जनालाई समेत सम्मान गरिएको थियो ।

प्रकाशित मिति: आइतबार, पुस २१, २०८१ २०:५७

प्रतिक्रिया दिनुहोस्