बाँकेमा नेपालगन्जबाट 'एचपीभी' खोप अभियानको शुभारम्भ

स्वास्थ्य

गृहपृष्ठ
स्वास्थ्य
बाँकेमा नेपालगन्जबाट 'एचपीभी' खोप अभियानको शुभारम्भ

बाँकेमा नेपालगन्जबाट 'एचपीभी' खोप अभियानको शुभारम्भ

मंगलबार, माघ २२, २०८१ बागेश्वरी पोस्ट

नेपालगन्ज । बाँकेमा पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपीभी) खोप लगाउन सुरु भएको छ । नेपालगन्ज उपमहानगरपालिकाको आयोजना एवम् स्वास्थ्य कार्यालय बाँकेको समन्वयमा वडा नम्बर १ धम्बोझीस्थित धम्बोझी माविबाट खोप लगाउने कार्यको सुरुवात गरिएको हो ।

नगर प्रमुख प्रशान्त विष्टले खोप अभियानको शुभारम्भ गरेका हुन् । विष्टले नेपालगन्ज-१ अहिर टोलकी १० वर्षीया शिवाङ्गी सुनारलाई खोप कार्ड हस्तान्तरण गरी खोप लगाउने कार्यको शुभारम्भ गरेका हुन् । पाठेघरको मुखको क्यान्सरबाट जोगाउन खोप प्रभावकारी भएको बताए । उनले निर्धक्कका साथ खोप लगाउन किशोरीहरुलाई आग्रह गरे ।

कार्यक्रममा नेपालगन्ज उपमहानगरपालिकाका प्रमुख प्रशासकीय अधिकृत ओम बहादुर खड्का, प्रवक्ता एवम् वडा नम्बर १ का अध्यक्ष प्रमोद रिजाल, स्वास्थ्य कार्यालय बाँकेका जनस्वास्थ्य अधिकृत तथा खोप फोकल पर्सन नरेशबाबु श्रेष्ठ, नेपालगन्ज उपमहानगरपालिका स्वास्थ्य महाशाखा प्रमुख राम बहादुर चन्द, नेपाल पत्रकार महासंघ बाँकेका अध्यक्ष नवीन गिरी, धम्बोझी माविका प्रधानाध्यापक बामदेव सुवेदी लगायतको उपस्थिति थियो ।

बाँकेमा करीब ३७ हजार किशोरीलाई पाठेघरको मुखको क्यान्सरविरुद्धको ‘ह्युमन पापिलोमा भाइरस’ (एचपीभी) खोप लगाइँदैछ । स्वास्थ्य कार्यालय बाँकेका अनुसार जिल्लाका आठ स्थानीय तहमा रहेका ३६ हजार ९ सय ५० जना किशोरीलाई खोप लगाइने भएको हो ।

स्वास्थ्य कार्यालय बाँकेका जनस्वास्थ्य अधिकृत तथा खोप फोकल पर्सन श्रेष्ठले बाँकेमा विद्यालयमा अध्ययनरत कक्षा ६ देखि १० सम्मका र विद्यालय बाहिर रहेका १० देखि १४ वर्ष उमेर समूहका किशोरीलाई खोप लगाउन थालिएको जानकारी दिए ।

फोकल पर्सन श्रेष्ठका अनुसार तीन सय ७८ वटा विद्यालयमा अध्ययनरत किशोरीलाई खोप लगाउनका लागि जिल्लामा चार सय ५९ वटा खोप केन्द्र तोकिएको छ । जसमा तीन सय ७८ वटा विद्यालयमा र ८१ वटा विद्यालय बाहिर खोप केन्द्र छन् । फोकल पर्सन श्रेष्ठका अनुसार पहिलो चरणमा नेपालगन्ज उपमहानगरपालिका, कोहलपुर नगरपालिका, खजुरा गाउँपालिका र जानकी गाउँपालिकाका २२ हजार ५ सय ८९ जना किशोरीलाई आजदेखि फागुन १ गतेसम्म खोप लगाइनेछ ।

नेपालगन्ज उपमहानगरपालिका स्वास्थ्य महाशाखा प्रमुख रामबहादुर चन्दका अनुसार नेपालगन्ज उपमहानगरपालिकाका २३ वटा वडाका ९ हजार ३ सय १९ जना किशोरीलाई एचपिभी खोप दिन लागिएको छ । उपमहानगरपालिकाका विद्यालयमा अध्ययनरत ७ हजार ४ सय ९८ जना र विद्यालय बाहिर रहेका १ हजार ८ सय २१ जना किशोरीलाई खोप लगाउन लागिएको चन्दले जानकारी दिए । ९९ सय वटा विद्यालय र २३ वटा स्वास्थ्य संस्था गरी एक सय २३ वटा खोप केन्द्रबाट माघ २२ देखि २९ गतेसम्म एचपिभी खोप लगाइने जनस्वास्थ्य निरीक्षक तेज वलीले जानकारी दिए ।

दोस्रो चरणमा माघ ३० गतेदेखि राप्तीसोनारी गाउँपालिका, बैजनाथ गाउँपालिका, डुडुवा गाउँपालिका र नरैनापुर गाउँपालिका गरी ४ वटा पालिकाका १२ हजार ३ सय ६१ जना किशोरीलाई खोप लगाउने लक्ष्य रहेको पनि श्रेष्ठले बताए ।

प्रकाशित मिति: मंगलबार, माघ २२, २०८१ १३:१४