बाँकेमा शतप्रतिशत बढी किशोरीले लगाए 'एचपीभी' खोप

स्वास्थ्य

गृहपृष्ठ
स्वास्थ्य
बाँकेमा शतप्रतिशत बढी किशोरीले लगाए 'एचपीभी' खोप

बाँकेमा शतप्रतिशत बढी किशोरीले लगाए 'एचपीभी' खोप

शनिबार, फागुन १०, २०८१ बागेश्वरी पोस्ट

नेपालगञ्ज । बाँकेमा शतप्रतिशत बढी लक्षित किशोरीले पाठेघरको मुखको क्यान्सर विरुद्धको एचपीभी खोप लगाएका छन् । एचपीभी खोप अभियान अन्तर्गत ३३ हजार ३७५ बालिकालाई खोप लगाउने लक्ष्य निर्धारण गरिएकोमा ३३ हजार ४५९ अर्थात १००.२५ प्रतिशत किशोरीलाई खोप लगाइएको स्वास्थ्य कार्यालय बाँकेका खोप फोकल पर्सन नरेश श्रेष्ठले बताए ।

उनले उक्त अभियान अन्तर्गत सबैभन्दा बढी खजुरा गाउँपालिकामा लक्ष्य भन्दा करीब ५७ प्रतिशत बढी किशोरीलाई खोप लगाइएको बताए । खजुरामा ३ हजार २५३ जनालाई खोप लगाउने लक्ष्य रहेकोमा ५ हजार १०० जनालाई खोप लगाइएको छ ।

यस्तै नेपालगञ्ज उपमहानगरपालिकामा पनि लक्ष्य भन्दा करीब दुई प्रतिशत बढी किशोरीलाई खोप लगाइएको छ । प्रायः खोप अभियानमा पछाडि पर्ने नेपालगञ्ज उपमहानगरमा यस पटक एचपीभी खोप उत्साहपूर्ण रुपमा लगाएको देखिएको छ । श्रेष्ठका अनुसार नेपालगञ्जमा ८ हजार २६२ जनालाई खोप लगाउने लक्ष्य रहेकोमा ८ हजार ४०० जनाले खोप लगाएका छन् ।

यस्तै डुडुवा गाउँपालिकामा पनि लक्ष्यको ९९.२३ प्रतिशत किशोरीले खोप लगाएका छन् भने राप्तीसोनारी गाउँपालिकामा ९७.८२ प्रतिशतले खोप लगाएका छन् । जानकीमा ९०.२३ प्रतिशत, बैजनाथमा ९६.६० प्रतिशत र नरैनापुरमा ९२.५७ प्रतिशत किशोरीले खोप लगाएका छन् । सबैभन्दा कम खोप लगाउनेमा कोहलपुर नगरपालिकामा ८३.१३ प्रतिशत किशोरीले खोप लगाएका छन् ।

माघ २२ गतेबाट खोप अभियान शुरु गरिएकोमा आठ पालिकालाई दुई चरणमा बिभाजन गरेर खोप लगाउने कार्य सम्पन्न गरिएको खोप फोकल पर्सन श्रेष्ठले बताए । कक्षा ६ देखि १० सम्म अध्ययनतरत किशोरी र बिद्यालय बाहिरका १० देखि १४ वर्ष उमेरका किशोरीहरुलाई खोप लगाइएको थियो ।

प्रकाशित मिति: शनिबार, फागुन १०, २०८१ १६:५९