नेपालगन्जमा नि:शुल्क स्वास्थ्य परीक्षण तथा सचेतना र्‍याली

स्वास्थ्य

गृहपृष्ठ
स्वास्थ्य
नेपालगन्जमा नि:शुल्क स्वास्थ्य परीक्षण तथा सचेतना र्‍याली

नेपालगन्जमा नि:शुल्क स्वास्थ्य परीक्षण तथा सचेतना र्‍याली

बिहीबार, फागुन २९, २०८१ बागेश्वरी पोस्ट

नेपालगन्ज । नेपालगन्ज उपमहानगरपालिकाले बिश्व मिर्गौला दिवस तथा नसर्ने रोगहरुको पहिचानका लागि संचालित एक महिने अभियानको समापन अवसरमा नि:शुल्क स्वास्थ्य परीक्षण तथा सचेतना र्‍यालीको आयोजना गरेको छ । नेपालगन्ज उपमहानगरपालिका कार्यालयबाट सुरु भएको र्‍याली बीपी चोक हुँदै नेपालगन्ज मेडिकल कलेज शिक्षण अस्पतालसम्म पुगेर पुनः नेपालगन्ज उपमहानगरमा आएर समापन भएको थियो ।

पछिल्लो समय मिर्गौला स्वास्थ्य समस्या विकराल बन्दै गएको भन्दै स्वास्थ्यकर्मीहरुले सचेत हुन जरुरी रहेको औंल्याएका छन् । बदलिँदो जीवनशैली र खराब खानपिनका कारण मिर्गौला जोखिममा परिरहेको स्वास्थ्यकर्मीहरुको भनाई छ । नियमित स्वास्थ्य चेकजाँचको अभावमा मिर्गौला फेल हुने समस्या जटिल स्वास्थ्य समस्याको रुपमा बढेको उनीहरुको तर्क छ ।

भेरी अस्पताल नेपालगन्जका मिर्गौला रोग विशेषज्ञ डा.सौरभ सिंह हमालले नियमित चेकजाँच गर्ने हो भने मिर्गौलालाई खराब हुनबाट जोगाउन सकिने बताए । त्यस्तै नेपालगन्ज उपमहानगरपालिका-२० का वडा अध्यक्ष कौशल धोबीले आफ्नो स्वास्थ्यबारे व्यक्ति आफैं सचेत हुनु पर्ने बताए ।

त्यस अवसरमा जनप्रतिनिधि तथा कर्मचारीहरुको नि:शुल्क स्वास्थ्य परीक्षण समेत गरिएको थियो । १०० जना भन्दा बढीको मिर्गौला स्क्रिनिङ, सुगर, प्रेसर र उचाई अनुसारको तौल मापन गरी आवश्यक परामर्श दिइएको नेपालगन्ज उपमहानगरपालिका स्वास्थ्य महाशाखाका जनस्वास्थ्य निरीक्षक जागेश्वर बस्नेतले बताए । केहीमा स्वास्थ्य समस्या पनि देखिएको उनले जानकारी दिए । कार्यक्रममा प्रमुख प्रशासकीय अधिकृत ओम बहादुर खड्का, प्रबक्ता प्रमोद रिजाल लगायत जनप्रतिनिधि र कर्मचारी उपस्थित थिए ।

प्रकाशित मिति: बिहीबार, फागुन २९, २०८१ १४:२७

प्रतिक्रिया दिनुहोस्